“რა შუაშია ივანიშვილი? ხომ არ გეშლებათ? შვილზე მთავრდება ორივე…” – კობახიძე ჰელსინკის კომისიის განცხადებაზე

პრემიერ–მინისტრი, ირაკლი კობახიძე ჰელსინკის კომისიის მწვავე განცხადებას პასუხობს:

„ძალიან შემაშფოთებელი მდგომარეობაა, იცით, რომ არის ცნობილი კეზერაშვილი, რომელიც არის მთავარი ეჭვმიტანილი ამ საქმეში, ის ცხოვრობს ევროკავშირის წევრ ერთ-ერთ ქვეყანაში და ევროკავშირის წევრი ქვეყნიდან ძარცვავს ევროპელ პენსიონერებს. ეს არის ის სურათი, რომელთან დაკავშირებითაც საჭიროა კიდევ უფრო მეტი სიცხადე, თუმცა ეს არის რეალური მოცემულობა. რაც შეეხება ჰელსინკის კომისიის ე.წ . დასკვნას, არ ვიცი ამას რა დავარქვა. ჩემი შენ გითხარიო – ეს არის ერთადერთი შეფასება, რომელიც ჰელსინკის ამ დასკვნასთან დაკავშირებით შეიძლება ითქვას. არ შეიძლება მხარს უჭერდე კეზერაშვილის მიერ პენსიონერების ძარცვას და თან იმავეს აბრალებდე სხვა სუბიექტს, რომელსაც ამასთან არავითარი კავშირი არ აქვს.

ბიძინა ივანიშვილი რა შუაშია ამ თემასთან, ან რა კავშირია ბიძინა ივანიშვილსა და ქოლ-ცენტრებს შორის? რა შუაშია ბიძინა ივანიშვილი და ქოლ-ცენტრები? კეზერაშვილში ხომ არ გეშლებათ? შვილზე მთავრდება ორივე. კეზერაშვილს მიხედეთ, ჩემი რჩევა ეს იქნება.“

„ჰელსინკის კომისია“ „ქართულ ოცნებას“ ე.წ. „ქოლ-ცენტრებიდან“ შემოსავლის მიღებაში ამხელს – გავრცელებულ განცხადებაში, კომისია წერს, რომ ივანიშვილის პარტია ოპოზიციის შემავიწროვებელ ოპერაციებს შავი ფულითა და თაღლითური ქოლცენტრების სქემით აფინანსებს.