ხუთშაბათს, 14 მაისს, სლოვენიის მთავრობამ ოფიციალურად განაცხადა, რომ ქვეყანაში კორონავირუსის პანდემია დასრულდა. ამის შესახებ ინფორმაციას Reuters ავრცელებს.
სლოვენია გახდა პირველი ევროპული ქვეყანა, რომელმაც ვურუსის დასრულება დაადასტურა. მსგავსი განცხადება სლოვენიის მთავრობის წევრებმა მას შემდეგ გააკეთეს, რაც ორი კვირის განმავლობაში ყოველდღიურად კორონავირუსის 7-ზე მეტი ახალი შემთხვევა არ დაფიქსირებულა.
“დღეს სლოვენიას აქვს საუკეთესო ეპიდემიოლოგიური სურათი ევროპაში”, — განაცხადა სლოვენიის პრემიერმინისტრმა.
პანდემიის დასრულება ნიშნავს, რომ გარკვეული ზომები, მათ შორის მოქალაქეებისთვისა და დაზარალებული ფირმებისთვის გამოყოფილი ფინანსური დახმარებები მაისის ბოლოს ამოიწურება.
თუმცა, კორონავირუსის გავრცელების პრევენციის მიზნით, წესების დაცვა კვლავ ძალაში რჩება.
რაც შეეხება ქვეყანაში შესვლას, ევროკავშირის წევრი სახელმწიფოებიდან შემსვლელებისთვის 14-დღიანი კარანტინი სავალდებულო არ იქნება, ხოლო არაწევრი ქვეყნების წარმომადგენლებისთვის კარანტინის გავლა სავალდებულოდ რჩება.
სლოვენიაში, რომლის მოსახლეობაც 2 მილიონია, კორონავირუსის 1 464 შემთხვევაა დადასტურებული, მათ შორის გარდაცვლილია 103 ადამიანი.
კომენტარები