ქუთაისის ციხეში პატიმრების მოწამვლასთან დაკავშირებით, პენიტენციური სამსახური პირველ ოფიციალურ განცხადებას ავრცელებს და წერს, რომ N2 პენიტენციური დაწესებულების მსჯავრდებულთა შორის გამოვლენილი ჩივილები შეესაბამება შესაძლო ენტეროვირუსული ინფექციის სიმპტომებს.
მათივე ცნობით, ამ ეტაპზე ყველა მსჯავრდებულის მდგომარეობა სტაბილურია.
სპეციალური პენიტენციური სამსახური ეხმიანება გავრცელებულ ინფორმაციას, ქუთაისის N2 პენიტენციურ დაწესებულებაში პატიმართა ჯანმრთელობის მდგომარეობასთან დაკავშირებით.
საზოგადოების ინფორმირების მიზნით განვმარტავთ, რომ მიმდინარე წლის 13 აგვისტოს N2 პენიტენციური დაწესებულების მსჯავრდებულთა შორის გამოვლენილი ჩივილები შეესაბამება შესაძლო ენტეროვირუსული ინფექციის სიმპტომებს. მდგომარეობის შესაძლო გართულების პრევენციის მიზნით, მსჯავრდებულთა ნაწილი გადაყვანილ იქნა სამოქალაქო სექტორის კლინიკაში.
ექიმ-სპეციალისტთა მიერ მათი მდგომარეობა შეფასებულ იქნა როგორც სტაბილური, მსუბუქი ხარისხის დარღვევებით. პაციენტებს გაეწიათ შესაბამისი სამედიცინო მომსახურება, ჩაუტარდათ ლაბორატორიული კვლევები და დაბრუნდებიან დაწესებულებაში სასჯელის მოხდის ადგილას.
კიდევ ერთხელ განვმარტავთ, რომ ამ ეტაპზე ყველა მსჯავრდებულის მდგომარეობა სტაბილური და დამაკმაყოფილებელია, იმყოფებიან სამედიცინო პერსონალის მუდმივი მეთვალყურეობის ქვეშ, – წერია განცხადებაში.
დაწესებულება არ წერს, რატომ არ გააკეთეს განცხადება თავად და რატომ ეძებდნენ საავადმყოფოში პატიმრებს პატრონები, ან როგორ მოხდა, რომ ადვოკატებმა და მედიამ დაასწრეს მათ ამ ინფორმაციის გავრცელება.
პენიტენციური არც იმას წერს, რა გახდა მიზეზი ენტეროვირუსული ინფექციის და პრინციპში არც იმას წერს, დიაგნოზი სიმპტომების შემდეგ, დადასტურდა, თუ არა, უწყება იმასაც კი არ წერს, მოხდა თუ არა საკნების დეზინფექცია, გამოვლინდა, თუ არა, წყარო ინფექციის გავრცელების, თუ ისევ რისკის ქვეშაა პატიმრების ჯანმრთელობა.
დღეს გავრცელდა ინფორმაცია, რომ ქუთაისში, N2 პენიტენციურ დაწესებულებაში პატიმრები, სავარაუდოდ, წყლით მოიწამლნენ.
საუბარია, მინიმუმ 15 პატიმარზე. ყველა მათგანი ქუთაისიდან ენტეროვირუსის სიმპტომებით თბილისში, კლინიკა ვივამედში გადაიყვანეს.
N2 პენიტენციურ დაწესებულებაში პატიმრები, სავარაუდოდ, წყლით მოიწამლნენ
კომენტარები