ალავერდის სამონასტრო კომპლექსის რეაბილიტაციისთვის სახელმწიფო 2 300 000 ლარს დახარჯავს. ამის შესახებ 9 აგვისტოს გამოქვეყნებული განკარგულებიდან ირკვევა, რომელსაც ირაკლი კობახიძე აწერს ხელს.
დოკუმენტის მიხედვით, კულტურული მემკვიდრეობის დაცვის ეროვნულ სააგენტოზე მთავრობამ თანხმობა გასცა, ახმეტის მუნიციპალიტეტში კულტურული მემკვიდრეობის ძეგლის – ალავერდის სამონასტრო კომპლექსში შემავალი წმ. გიორგის ტაძრის, სამრეკლოს, საეპისკოპოსო სახლისა და კომპლექსში შემავალი სამუზეუმო და სამეურნეო ნაგებობების სტიქიის შედეგად მიყენებული დაზიანებების გადაუდებელი რეაბილიტაციის მიზნით საჭირო სამუშაოების შესყიდვა გამარტივებული წესით განახორციელოს.
ამისთვის კი მუნიციპალური განვითარების ფონდმა „რეგიონული და მუნიციპალური ინფრასტრუქტურის რეაბილიტაციის“ პროგრამის ფარგლებში მუნიციპალური განვითარების ფონდის მიერ განსახორციელებელი პროექტების ქვეპროგრამის ასიგნებებიდან 2 300 000 ლარი სააგენტოს ანგარიშზე უნდა გადარიცხოს.
კულტურული მემკვიდრეობის სააგენტოს მიერ 9 აგვისტოს გავრცელებული ინფორმაციით, ალავერდის სამონასტრო კომპლექსში სტიქიის შედეგების აღმოფხვრა გრძელდება.
25 ივნისის ახმეტის მუნიციპალიტეტის სოფელ ალავერდში, მონასტრის ტერიტორიაზე ქარბორბალა ამოვარდა, რომლებმაც ალავერდის ტაძრის გუმბათის თუნუქის საფარი გადახადა, ამასთან ჩრდილოეთი კალთის სხვადასხვა ადგილას დამტვრეულია ლორფინის ქვები, დანარჩენ ადგილებში დაზიანებულია კრამიტის სახურავი, ჩამსხვრეულია ტაძრის დასავლეთი მხარისა და გუმბათის სარკმლები, დაზიანებულია სამრეკლოს თუნუქისა და საეპისკოპოსო სახლის კრამიტის სახურავები, ჩამოშლილია სასახლის აივანი, ტაძრის გუმბათიდან ჩამოვარდნილია ჯვარი და დაზიანებულია მიმდებარე ტერიტორიის ინფრასტრუქტურა.
ალავერდის ეპარქიისა და სააგენტოს წარმომადგენლებთან შეთანხმებით სასწრაფოდ დაიწყო და გრძელდება ტაძრის ირგვლივ ხარაჩოს აგება, რათა სპეციალისტებმა შეძლონ სრულფასოვნად მუშაობა. ალავერდში გაიგზავნა 4 500 კვ. მ ხარაჩოს მასალა.
კულტურული მემკვიდრეობის დაცვის ეროვნული სააგენტოს ცნობით, აქტიურ სამუშაოებს აგრძელებს ალავერდის სამონასტრო კომპლექსის საეპისკოპოსო სახლზე და უახლოეს დღეებში დასრულდება ქუჩის მხრიდან (ფასადი) კრამიტის ახალი საბურველის მოწყობა.
არქიტექტორ-რესტავრატორებისა და კონსტრუქტორების მიერ ამ დრომდე მიმდინარეობს კარიბჭე-სამრეკლოს საპროექტო სამუშაოები, რაც ემსახურება თუნუქის საბურველის მოხსნის შემდგომ გადახურვის სარესტავრაციო მეთოდოლოგიის შემუშავებას.
წმ. გიორგის სახელობის ტაძრის დასავლეთ მინაშენზე (სტოა) დასრულდა აგურის კარნიზის რესტავრაცია და გადახურვის კონსტრუქციის მოსაწყობი სამუშაოების შემდგომ ეტაპზე იგეგმება საიზოლაციო ფენის დაგება და კრამიტის ახალი საბურველის მოწყობა. გარდა ამისა, საკათედრო ტაძრის გუმბათის წვერს მიუახლოვდა ხარაჩოს მოწყობის პროცესი, რაც, შესაბამის საპროექტო სამუშაოებთან ერთად, ტაძარზე ჯვრის აღმართვის აუცილებელი წინაპირობაა.
კომენტარები