ჩრდილოეთ ამერიკის ეპისკოპოსი, მეუფე საბა ინწკირველი პოსტს აქვეყნებს, რითაც სოციალურ ქსელში გავრცელებულ ვიდეოს ეხმაურება.
“მე როგორც ემიგრაციული ეპარქიის მღვდელმთავარი და ჩრდილოეთ ამერიკის ქართული ეპარქიის მმართველი ეპისკოპოსი თავს ვალდებულად მივიჩნევ ყველგან და ყოველთვის ხმა აღვიმაღლო მაშინ, როცა საქმე ეხება ემიგრანტს და ზოგადად ემიგრაციას!
პირველ რიგში ვგმობ ამერიკის სახელმწიფოს დემონიზირების მცდელობას, გარდა იმისა რომ ამერიკის შეერთებული შტატები ჩვენი ქვეყნის ყველაზე მჭიდრო პარტნიორია, ამავე დროს მავანს არ უნდა დაავიწყდეს, რომ ამერიკაში უკვე მრავალი წელია არსებობს და ფუნქციონირებს საქართველოს მართლმადიდებელი ეკლესიის მიერ დაარსებული ეპარქია, რომელსაც უკვე 10 წელია ღვთივ-კურთხეულ სამღვდელო და სამონაზვნო დასთან თანამსახურებით ვხელმძღვანელობ მე, ეპისკოპოსი საბა საქართველოს ეკლესიის წმინდა სინოდის წევრი.
როგორც ლოცვა გვასწავლის ,,ღმერთი ყოველგან არს და ყოველსავე აღსვსებს” ამრიგად სამშობლოდან და ოჯახებიდან მოწყვეტილი ათასობით და ასი ათასობით ქართველი ღმერთს პოულობს აქ ამერიკაშიც, აქ სადაც არაერთ შტატში უკვე არსებობს ქართული ეკლესია-მონასტრები, მუდმივი და მისიონერული სამრევლოები, კულტურული ცენტრები, საკვირაო სკოლები და კიდევ მრავალი დაწესებულება, რომელიც ემსახურება ქრისტესთან ნაზიარები ქართული სულის აღორძინებასა და გადარჩენას!
დაუშვებლად მიმაჩნია ნებისმიერი სახით ემიგრანტის შეურაცხყოფა და დამცირება! თანაც იმ ფონზე, როცა უცხოეთში არსებულ ეპარქიებს და აქ მდებარე ეკლესია-მონასტრებს სწორედ ემიგრაცია აშენებს, ამშვენიერებს, ინახავს და ზრუნავს მათზე! განა ემიგრაციის დამსახურება და ღვაწლი არაა, ამდენი სიკეთე რაც ჩვენს ქვეყანის შიგნით თუ მის ფარგლებს გარეთ ხდება?!
ამრიგად მოვუწოდებ ჩვენს საყვარელ ემიგრანტებს და განსაკუთრებით ჩემს სულიერ შვილებს ამერიკაში, თქვენ გული ნუ გაგიტყდებათ როდესაც ერთეულ შემთხვევებში არ ხდება თქვენს მიერ სამშობლოსთვის გაღებული მსხვერპლის თუ თქვენი პირადი ღვაწლის სათანადოდ არ დაფასება, თქვენ არასდროს მიგატოვებთ ღმერთი და მე როგორც თქვენი მწყემსი!
მიიღეთ ჩემი ლოცვა-კურთხევა და კეთილი სურვილები ამ წმინდა დღეებში, როცა ჩვენი ეკლესია ზეიმობს სიყვარულის ღმერთის იესო ქრისტეს საყვარელი მოწაფეებისა და მოციქულების პეტრესა და პავლეს ხსენების დღეს!
ისწავლეთ მათ მაგალითზე სიყვარული და პატიება!
+ საბა
ჩრდილოეთ ამერიკის ეპისკოპოსი”.
ინფორმაციისთვის, ერთ-ერთმა მღვდელმა სამების ტაძარში არ შეუშვა მამაკაცი იმის გამო, რომ მას შორტი ეცვა. სასულიერო პირმა დამაკნინებელ კონტექსტში მოიხსენია ემიგრანტი.
კომენტარები