პატარა ქვეყნის დიდი ძალისხმევა: როგორ გახდა საქართველო სამაგალითო COVID-19-ის წინააღმდეგ ბრძოლაში, – ამ სათაურით აქვეყნებს ავსტრიის პრესის სააგენტო (APA) სტატიას სადაც ჯანდაცვის მინისტრის, ეკატერინე ტიკარაძის ინტერვიუზე დაყრდნობით დეტალურადაა განხილული ის ნაბიჯები, რომლებიც ქვეყანამ პანდემიის შეჩერების მიზნით გადადგა.
„იანვრის დასაწყისშივე, საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს მხრიდან გადაიდგა კონკრეტული ნაბიჯები შესაძლო ეპიდემიის შეჩერებისა და მართვის მიზნით. აეროპორტებში და სახმელეთო საზღვრებზე დაიწყო საინფორმაციო კამპანია. მგზავრები ქვეყანაში შემოსვლისთანავე იღებდნენ ინფორმაციას, როგორ უნდა მოქცეულიყვნენ ვირუსის დამახასიათებელი სიმპტომების აღმოჩენის შემთხვევაში. მალევე საზღვრებზე დაიწყო თერმული სკრინინგიც. გარდა ამისა, რისკის ქვეყნებიდან შემოსული მგზავრები, დაკვირვების მიზნით, პირდაპირ საკარანტინო ზონებში გადაჰყავდათ“
გამოცემა ხაზს უსვამს, რომ საქართველომ ვირუსთან ბრძოლის მიზნით, ყველა საჭირო რესურსი გამოიყენა და დამატებით, COVID-19-ის გავრცელების პრევენციის მიზნით, სპეციალური აპლიკაცია Stop COVID დანერგა, რომელიც მოსახლეობისთვის ინფიცირებულ პირთან შესაძლო კონტაქტის შესახებ ინფორმაციის მიწოდებას ემსახურება.
„ჯერ არ არსებობს მოლოდინი, რომ ახალი კორონავირუსი საქართველოში, ან სხვა ქვეყნებში სრულად გაქრება. ამიტომ მნიშვნელოვანია, თითოეულმა სახელმწიფომ და მოქალაქემ ვისწავლოთ ამ ვირუსთან თანაცხოვრება, რათა ეს პროცესი ვაქცინის და უფრო ეფექტური მკურნალობის დანერგვამდე სწორად მართული და უსაფრთხო იყოს“, – აღნიშნავს ეკატერინე ტიკარაძე გამოცემასთან.
სტატიის დასასრულს, ნათქვამია, რომ „სწრაფი და ეფექტური ნაბიჯები პანდემიასთან ბრძოლაში საქართველოს ერთ-ერთ სამაგალითო ქვეყანად წარმოაჩენს, რამაც თვალსაჩინო გახადა, რომ კრიზისულ ვითარებაში არა მხოლოდ ქვეყნის რესურსია მნიშვნელოვანი, არამედ მისი ეფექტური და დროული მენეჯმენტი.“
1 ტვ
“ალია” – შეგახსენებთ, ჯანდაცვის მინისტრი და მისი პიარის სამსახური (გარდა სოციალური განყოფილებისა) “ალიას” არ პასუხობს. რატომ არის მინისტრისთვის უცხო ქვეყნის პრესა უფრო მნიშვნელოვანი? უფრო კომფორტულად გრძნობს მათთან თავს? უკეთეს კითხვას უსვამენ? – სხვათა შორის, მინისტრმა დროა იცოდეს, რომ ცუდი კითხვა არ არსებობს, არსებობს ცუდი პასუხი.
და არსებობს ფაქტები, რომელიც ავსტრიის მედიას არ გადაუმოწმებია, როგორც ჩანს, ენდო მინისტრის სიტყვებს – მაგალითად, ის, რომ იანვრის დასაწყისში კი არა, 25 იანვარს დაიწყო სამინისტრომ აეროპორტში და საზღვრებზე თერმოსკრინიგი.
და არათუ იანვარში, მარტის დასაწყისშიც კი ვერ შესძლეს ადამიანების ინფორმირება, რა სიმპტომების დროს როგორ მოქცეულიყვენ რისკ ჯგუფის ქვეყნიდან ჩამოსვლისას – ქვეყნის მთავარი ეპიდემიოლოგის შვილთან, იტალიიდან ჩამოსული კოლეგა იყო შეხვედრაზე მისული – იყვნენ თუ არა ინფიცრებული და მისი თანამშრომლები ინფორმირებულნი? – ეს კითხვა არ დაუსვამს ავსტრიის პრესას – მაგრამ დასვამდა “ალია”.
ამიტომ არ პასუხობს მინისტრი “ალიას” და პასუხობს უცხოურ მედიას.
ერთი პატარა ნიუანსია კიდევ, გინდ ავსტრიაში, გინდ საქართველოში გაცემულ ინტერვიუს, ისევ ქართველი მკითხველი ეცნობა მინისტრო და არ არის ქართველი მკითხველი ასე ხელწამოსაკრავი!
კომენტარები