“ვიბრძვით! ყველას გვერდში დავუდგებით” – ეკა ნიჟარაძე. 

ახალგაზრდა მსახიობის ანანო მახარაძის საქმეზე განაჩენის გამოცხადება გადაიდო, მოსამართლე გადაწყვეტილებას 4  ივნისს გამოაცხადებს. რუსული კანონის მოწინააღმდეგე მსახიობს ადმინისტრაციულ სამართალდარღვევას – გზის გადაკეტვას ედავებიან.

სასამართლოში მახარაძის მხარდასაჭერად დღეს მისი კოლეგები მივიდნენ. ეკა ნიჟარაძე არ გამორიცხავს, რომ სასამართლოში ხელისუფლებისთვის მიუღებელი პოზიციის მქონე სხვა მსახიობებიც დაიბარონ და დააჯარიმონ.

“გზა გადაკეტა 200 000-მა ადამიანმა, ეს ყველასთვის არის ცნობილი, მარტო მამუკა მდინარაძემ არ იცის ეს ამბავი. ალბათ, ყველას დაგვიბარებენ, გადავიხდით ჯარიმებს, ვინც ვერ იხდის, მისთვის აუცილებლად შეგროვდება თანხა, ყველას გვერდში დავუდგებით. ვიბრძვით!” – აცხადებს ეკა ნიჟარაძე. 

დღეს სასამართლოს შენობაში იმყოფებოდნენ  ბაია დვალიშვილი, ნატა მურმანიძე და ქართული კინოს და თეატრის სხვა ხელოვანები.