,, ნუ დამიწყებთ ჭკუის სწავლებას, რომ აშშ აკონტროლებს ტრანზაქციებს და ა.შ. “არგუმენტებით” – გია ხუხაშვილი

პარლამენტში ,,ოფშორების კანონზე” პრეზიდენტის მოტივირებული შენიშვნების განხილვა მიმდინარეობს. ექსპერტი გია ხუხაშვილი ამ თემაზე თავის მოსაზრებებს წერს:

,,დღეის მდგომარეობით ოფშორული ზონების იურისდიქციაში განთავსებულია ასეულობით მილიარდი დოლარის სხვადასხვა აქტივები მარტივი მიზეზის გამო – რათა ამ აქტივების მფლობელებმა მოახდინონ მათზე კუთვნილი გადასახადების ოპტიმიზაცია, ან თუნდაც თავის არიდება.

აქ მთავარი კითხვაა – ვის და რა მოტივი შეიძლება გაუჩნდეს ამ აქტივების საქართველოში ტრანზიტთან დაკავშირებით? ისინი იქაც გათავისუფლებული არიან გადასახადებისგან და რაში შეიძლება დასჭირდეთ ტრანზიტთან დაკავშირებული ზედმეტი პროცედურული თავის ტკივილი?

პასუხი მარტივია:

მხოლოდ იმ აქტივებს, რომლებიც არსებულ ოფშორულ ზონებში დღევანდელ რეალობაში ვერ გრძნობე თავს კომფორტულად, შესულები არიან მაღალი რისკის ზონაში სანქციებიდან გამომდინარე, ან ქონება სადავოა, მიმდინარეობს ან მოსალოდნელია სასამართლო პროცესები.

კიდევ ერთხელ შემოგთავაზებთ ასეთი ინტერესის მქონე სუბიექტების სავარაუდო სიას:

1. კრემლის და მისი დანაყოფების (ფსბ, გრუ) აქტივები;

2. რუსული კრიმინალური სამყაროს სალაროს აქტივები;

3. რუსული ოლიგარქიული (უკვე სანქცირებული, ან სანქციების მოლოდინში მყოფი) აქტივები;

4. იარაღით და ნარკოტიკებით ვაჭრობის შედეგად მოპოვებული აქტივები;

5. სადავო აქტივები, რაზეც მოსალოდნელია სასამართლო პროცესები.

ამასაც გავიმეორებ:

სხვა ტიპის ცივილიზებულ ბიზნესს არა აქვს არანაირი მოტივი ამ ტიპის ტრანზიტისთვის.

ამ პროცესის დამანგრეველი შედეგები თავად შეგიძლიათ განსაჯოთ.

გთხოვთ, ნუ დამიწყებთ ჭკუის სწავლებას, რომ აშშ აკონტროლებს ტრანზაქციებს და ა.შ. “არგუმენტებით”.

აქ საუბარი იმდენად ფინანსურ ტრანზაქციებზე არ არის, რამდენადაც აქტივების საქართველოს იურისდიქციაში გადმოფორმებაზე, რისი კონტროლიც ურთულესი პროცესია და დღემდე ვერავინ მოახერხა.

ნურც იმას იტყვით, რომ ჩვენი ქვეყანა რამეს ისარგებლებს. პირიქით, მივიღებთ უზარმაზარ როგორც რეპუტაციულ, ასევე მატერიალურ ზარალს. ბიძინას და ქოცებს არ ვგულისხმობ – მათ შეიძლება ისარგებლონ კიდეც…”