“როცა ქართველები უკრაინაში იბრძოდნენ, მაშინ არ გახსენებიათ “შინაურ საქმეებში ჩარევა”

სამოქალაქო აქტივისტი, დავით მარდალეიშვილი, წერს:

“რა თქმა უნდა, უკრაინას, დღევანდელი მდგომარეობით, აქვს უფლება სააკაშვილი სადაც უნდა იქ დანიშნოს – ზელენსკი არაფერ შუაშია, პოროშენკოს გაუაზრებელ გადაწყვეტილებაში, უკრაინის მოქალაქეობა მიენიჭებინა სააკაშვილისთვის…

მ ა გ რ ა მ როდესაც მისი ვიცე-პრემიერად დანიშვნა დააპირეს და გაიგეს, ჩვენი სახელმწიფოს დამოკიდებულება, ამ საკითხთან მიმართებაში, როგორც მეგობარს და სტრატეგიულ პარტნიორს, მაშინვე უნდა დაემთავრებინა მიშას სახელმწიფო თანამდებობაზე დანიშვნის თემა.

დღეს, აბსოლუტურად მართლები არიან, როდესაც ამბობენ, – ჩვენს მოქალაქეს სადაც გვინდა დავნიშნავთ და ნუ ერევით ჩვენს შინაურ საქმეებშიო….

მ ა გ რ ა მ რატომღაც მაშინ არ გახსენებიათ, “შინაურ საქმეებში ჩარევა” როდესაც ქართველი ბიჭები უკრაინაში იბრძოდნენ, რუსეთის წინააღმდეგ და აქ კი, მთელ ფეისბუქს (ოღონდ, მე არა) ლურჯ-ყვითელი დროშები ეყენა პროფილ-ქავერზე, სოლიდარობის ნიშნად. აღარაფერს ვამბობ, მაია ორჯონიკიძის მიერ, მართალია, უნიჭო, მაგრამ მაინც ლექსების მიძღვნაზე, ნადია სავჩენკოსთვის.

უბრალოდ, ძალიან მარტივი რამაა: მეგობარი, ისევე როგორც ცხოვრებაში, იმით გამოირჩევა უბრალო ნაცნობისგან, რომ ის მზადაა, უმნიშვნელო რაღაცები მაინც დათმოს, შენი გულისთვის, რითაც ოდნავ მაინც შეეზღუდება მისი ლეგიტიმური უფლება, ვთქვათ, გავიდეს სახლიდან, როცა იცის, რომ უნდა ესტუმრო.

ზელენსკის კონსტიტუციური უფლება აქვს, რომ ხალათით და “შლოპანცებით” დახვდეს საერთაშორისო სტუმრებს, მაგრამ რატომ იზღუდავს ამ უფლებას?! იმიტომ, რომ ეტიკეტსა და ტაქტს ეწინააღმდეგება.

ასე, რომ უკრაინის, როგორც საქართველოს მეგობარი და სტრატეგიული პარტნიორი სახელმწიფოსგან, მიშას თანამდებობაზე დანიშვნა იყო ძალიან არამეგობრული საქციელი… სააკაშვილს საქართველოში ჩადენილი აქვს უმძიმესი დანაშაულები – ბიუჯეტის უკანონო ხარჯვა, ადამიანების და ბიზნესის რეკეტი, მკვლელობების დაგეგმვა, მკვლელობაც კი. სააკაშვილმა საქართველოში შექმნა რეჟიმი, ისეთივე როგორც ფრანკომ ესპანეთში, რასაც შეეწირა უამრავი ქართველის სიცოცხლე და ჯანმრთელობა.

აი, ამ ფაქტებისთვის უნდა გაეწია ანგარიში ზელენსკის და არ დაენიშნა მიშა სახელმწიფო თანამდებობაზე, თორემ ჰყოლოდა, არაფორმალურ მრჩევლად, ეხადა შავი ფული ხელფასად და დაეჯერებინა მისი რჩევებისთვის, რეფორმების სფეროში. კი, ბატონო, რა ჩიტსაც დაგაჭერინებთ, ცოტა ხანში, მაგასაც ვნახავთ და ნაღდად არ ვუსურვებ წარმატებებს, მის მიერ დახოცილი და ნაწამები ადამიანების სახელით.”