საქართველოს საგარეო საქმეთა მინისტრის მოადგილემ, მიხეილ ნინუამ თანამდებობა დატოვა.
როგორც საგარეო უწყება აცხადებს, ნინუამ თანამდებობა პირადი განცხადების საფუძველზე დატოვა.
„საქართველოს საგარეო საქმეთა მინისტრის მოადგილემ, მიხეილ ნინუამ თანამდებობა დატოვა პირადი განცხადების საფუძველზე, უნდა აღინიშნოს, რომ სწორედ მიხეილ ნინუას უშუალო ხელმძღვანელობით და ჩართულობით ხორციელდებოდა COVID პანდემიის პირობებში საგარეო საქმეთა სამინისტროს ძირითადი ამოცანების – უცხოეთში მყოფი ჩვენი თანამემამულეების სამშობლოში დაბრუნებისა და ადგილზე მათი დახმარების უზრუნველყოფა, რასაც, ყველასთვის ცნობილია, რომ სახელმწიფომ, სამინისტრომ და უშუალოდ მან ღირსეულად გაართვეს თავი.
აღსანიშნავია, რომ მიხეილ ნინუამ სხვა სფეროში საქმიანობის გაგრძელების შეთავაზება დიდი ხნის წინ მიიღო და გეგმავდა უწყების დატოვებას, თუმცა უძღვებოდა რა პანდემიის ფონზე არსებული ამოცანების გადაჭრის პროცესს, პოსტის დატოვების გადაწყვეტილება მიიღო მხოლოდ აღნიშნული კრიტიკული ფაზის დასრულების შემდეგ. ჩვენ მას განვიხილავთ ჩვენი დიპლომატიური კორპუსის უაღრესად ფასეულ და ღირსეულ წევრად”
როგორც “ალიასთვის” კულუარულად გახდა ცნობილი, სინამდვილეში საგარეო საქმეთა მინისტრის მოადგილე – უკრაინაში მიხეილ სააკაშვილის დანიშვნას გადაჰყვა – კერძოდ, მას ედავებიან იმას, რომ მან ვერ შესძლო ზუსტი ინფორმაციის გამოტანა უკრაინელი კოლეგებიდან და დააიმედა “ოცნების” ლიდერები, რომ სააკაშვილი არ ინიშნებოდა თანამდებობაზე, რასაც მოჰყვა “ოცნების” ლიდერების უკვე ამ გადასახედიდან არაადეკვატური განცხადებები.
მინისტრის მოადგილეს, იმის გამოც უთხრეს საყვედური, რომ მან ვერ შესძლო დაერწმუნებია უკრაინელი კოლეგები, რომ არ დაეშვათ სააკაშვილის დანიშვნა მაღალ თანამდებობაზე.
კომენტარები