ბათუმში ყოფილი პირველი აფთიაქის შენობის ახალი მფლობელი „მეტრო ჰოლდინგის“ დამფუძნებელი გალიფ ოზთურქია. 2019 წლის დეკემბერში მან ამ ქონების მესაკუთრე კომპანიის შპს „ჟასმინის“ ასი პროცენტი შეისყიდა.
კომპანიის წილებში გალიფ ოზთურქმა ჯამში 42 მილიონი ლარი [13 მილიონ აშშ დოლარი] გადაიხადა. შესაბამისად ის გახდა ბათუმის ცენტრში, ევროპის მოედნის მიმდებარედ არსებული ორსართულიანი კულტურული მემკვიდრეობის ძეგლის მფლობელი. მანვე აიღო ის ვალდებულებებიც, რასაც შპს „ჟასმინს“ აჭარის მთავრობასთან 2011 წელს გაფორმებული ხელშეკრულება ავალდებულებდა.
„მეტრო ჰოლდინგს“ მოუწევს იმ პირგასამტეხლოს გადახდაც, რაც ამ დრომდე შპს „ჟასმინს“ შეუსრულებელი ვალდებულებების გამო ერიცხებოდა. ეს თანხა დღეის მდგომარეობით ორ მილიონ ლარს აჭარბებს.
2011 წელს კომპანია „ჟასმინმა“ აფთიაქის შენობის შესაძენად ამ თანხაზე ბევრად ნაკლები, ერთი მილიონი დოლარი გადაიხადა.
ხელშეკრულებით ნაკისრი ვალდებულებების თანახმად აფთიაქის ყოფილ შენობაში „ჟასმინი“ სასტუმროს მოწყობას გეგმავდა, სადაც სამი წლის განმავლობაში არანაკლებ 80 საქართველოს მოქალაქე უნდა დაესაქმებინა.
ხელშეკრულების დადების შემდეგ შპს „ჟასმინმა“ გამოისყიდა დუმბაძის ქ #16-18/მ.აბაშიძის ქ#34 მდებარე შენობაში არსებული კერძო ფართობი და სამინისტროში სასტუმრო-კომპლექსის მშენებლობისთვის პროექტი წარადგინა, რომელიც შენობის უკანა მხრიდან 11 სართულის დამატებას ითვალისწინებდა. დაახლოებით ისე, როგორც ფოსტის შენობას დააშენეს.
კომპანიამ მშენებლობა ვერ დაიწყო, რადგან პროექტი კულტურული მემკვიდრეობის სააგენტოს ძეგლების საბჭომ დაიწუნა. სააგენტომ პროექტი არ განიხილა და კომპანიისგან შენობის რეაბილიტაციის პროექტი მოითხოვა. ასეთი პროექტი შპს „ჟასმინს“ არ მოუმზადებია. მისი აქტივობებიც შენობასთან დაკავშირებით აქ შეწყდა. მემედ აბაშიძის ქუჩაზე, #32/34-ში, ყოფილი პირველი აფთიაქის შენობა წლების განმავლობაში იყო ჩაკეტილი. დაკეტილ შენობაში წვიმდა, რის გამოც ინტერიერი, ასევე ფასადი, მნიშვნელოვნად დაზიანდა.
ახალმა მფლობელმა კულტურული მემკვიდრეობის დაცვის სააგენტოს 2020 წლის 10 აპრილს ძეგლის ფასადის რეაბილიტაციის პროექტით მიმართა. პროექტი არ ითვალისწინებს არანაირ ცვლილებას, ახალ მესაკუთრეს ჯერ მხოლოდ ფასადის რეაბილიტაციის დაწყება სურს და ნებართვას ითხოვს. სააგენტოს ძეგლების საბჭოს ჯერ ამ საკითხზე არ უმსჯელია.
ყოფილი პირველი აფთიაქის შენობა მემედ აბაშიძის გამზირზე XIX-XX საუკუნეების მიჯნაზე ააგეს ბათუმში. თავიდანვე აქ ფუნქციონირებდა „პეტკევიჩის აფთიაქი“ და „სოკოლოვსკის სამკურნალო“.
აბაშიძის ქუჩას XX საუკუნის დასაწყისში მარიას გამზირი ერქვა. ეს ერთ-ერთი ყველაზე მჭიდროდ განაშენიანებული და საქმიანი ქუჩა იყო ძველ ბათუმში. XX საუკუნის დასაწყისში აქ ცხოვრობდნენ ქალაქის შეძლებული ოჯახები და ფუნქციონირებდა საზოგადოებრივი დანიშნულების სხვადასხვა ობიექტი.
შენობა თავდაპირველად ორსართულიანი იყო, რამდენიმე წლის წინ მას გუმბათებიანი მანსარდა დააშენეს.
ბათუმელები
კომენტარები