“სადაც უნდა ჩააბაროთ მაინც ამოვიცნობ, დანიშნული მქონდა! – ავტომანქანაზე ოთხივე საბურავი მომიხსნეს” – მოქალაქე

მოქალაქე დარინა ვარშანიძე „ბათუმელებთან“ ამბობს, რომ 6 მარტს, მისი პირადი ავტომობილი გაძარცული დახვდა. ავტომანქანაზე ოთხივე საბურავი მოხსნილია.

„დავით მიქელაძის ქუჩაზე, კერძო სახლის წინ მეყენა ავტომობილი, რადგან საპარკინგე ადგილი ყოველთვის დაკავებულია, ჩემს კორპუსს კი არც შიდა ეზო აქვს და არც შიდა პარკინგი. ყოველთვის კორპუსის წინ ვაყენებდი ხოლმე ავტომანქანას და ამის გამო ყოველდღე 10-ლარიანი ჯარიმა მომდიოდა.

თვეში 120 ლარიც კი გადამიხდია ამის გამო. ახლა დავაყენე უკანა ჩიხში და აი, ასეთი შედეგი დადგა.

დილით, დაახლოებით 12:00 საათისთვის ბავშვთან ერთად მივედი ავტომობილთან და დამხვდა ამ მდგომარეობაში. ოთხივე საბურავი მოხსნილი აქვს მანქანას“.

„დავრეკე 112-ში, მოვიდნენ გადაიღეს ფოტოები, გამომკითხეს განყოფილებაში და ველოდები მათგან რეაგირებას“, – ამბობს დარინა.

დარინა ვარშანიძის თქმით, კერძო სახლზეა ვიდეოსათვალთვალო კამერაა დამონტაჟებული და იმედი აქვს, რომ ამ პირების იდენტიფიცირება მოხდება.

„ფაქტია, რომ ქურდებმა პატარა ბავშვთან ერთად დამტოვეს ქუჩაში, მანქანის გარეშე. ალბათ სხვა ადამიანებმაც უნდა გამოიჩინონ სიფრთხილე, რომ არ აღმოჩნდნენ  მსგავს მდგომარეობაში“, – ამბობს დარინა ვარშანიძე.

დარინა, სოციალურ ქსელში, წერს:

მეგობრებო არ დატოვოთ მანქანა არასაპარკინგე ზონაში, მომრავლდა ქურდობები, არ შეცდეთ ჩემსავით…ვინც ეს გააკეთა იქნება სინდისი ეყოს და დააბრუნოს ეს საბურავები, სადაც არ უნდა ჩააბაროთ მაინც ამოვიცნობ დანიშნული მქონდა!!