“ასეთი დაჩქარებული ამნისტიები, როგორც წესი, საარჩევნო მოსყიდვის მიზნებს ემსახურება” – მეზვრიშვილი

ყველა, ვინც ხალხს ეუბნება, რომ ასეთი ტიპის ამნისტიის დაანონსებისას ციხეში პატიმრების რაოდენობის შემცირების ჰუმანური მიზნები ამოძრავებს, ან შეგნებულად ცრუობს ან წარმოდგენა არ აქვს რაზე საუბრობს. საბოლოო ჯამში, ერთიც და მეორეც კატასტროფაა ქვეყნის კრიმინოგენული მდგომარეობისთვის.

ასეთი დაჩქარებული ამნისტიები, დანაშაულის მდგომარეობის და რეციდივის საშიშროების ანალიზის გარეშე, როგორც წესი, საარჩევნო მოსყიდვის მიზნებს ემსახურება. ამ დროს არავის აინტერესებს როგორ აისახება ამნისტია ნარკოტიკების გასაღებაზე, კორუფციაზე, ქურდულ სამყაროზე და ა.შ. ციხიდან გამოსული განსაკუთრებით მძიმე დანაშაულისთვის მსჯავრდებულები ჩაიდენენ თუ არა ახალ დანაშაულს. ამ დროს მთავარია, რამდენ ამომრჩეველთან ვაჭრობის შესაძლებლობა მიეცემა ხელისუფლებას.

ასეთი ტიპის ამნისტიების დრო უნდა დასრულდეს ამ ქვეყანაში. არ შეიძლება დამნაშავემ შეღავათი ქვეყანაში დანაშაულის მატების ხარჯზე (ან მინიმუმ ამ რისკების შეფასების გარეშე) მიიღოს. ამნისტია ჰუმანური აქტი მაშინ არის, როცა კრიმინონეგული მდგომარეობის ანალიზზე დაყრდნობით და რეციდივის რისკების გაზომვით ხორციელდება. დანარჩენი ყველაფერი არის ტყუილი და ბინძური პოლიტიკური ვაჭრობა.

სწორედ ასეთი ამნისტიაა დაანონსებული, რომელიც ეხება ნარკოტიკების გამსაღებლებს, ქრთამის ამღებებს და მიმცემებს, მძიმე და განსაკუთრებით მძიმე დანაშაულის ჩამდენებს, ყოველგვარი ანალიზის და რისკების შეფასების გარეშე.

ეს მახინჯი პრაქტიკა უნდა დასრულდეს – შეღავათები ერთი მხრივ, დამსახურებული და მეორე მხრივ, კრიმინოგენული მდგომარეობის ადეკვატური უნდა იყოს.