თბილისში, ჰეიდარ ალიევის სანაპიროზე, ყოფილი რესტორნის „არაგვის“ ტერიტორიაზე ხუთი მულტიფუნქციური ცათამბჯენის აშენების მიზნით, განაშენიანების რეგულირების გეგმის გეგმარებითი დავალებაზე მოთხოვნა მერიაში უკვე წარდგენილია.
კომპანია „სითი ცენტრი“ საჯარო რეესტრში 2009 წელს დარეგისტრირდა, მისი დირექტორი აკაკი სონღულიაა, რომელიც ამავე დროს “ალიანს ჯგუფის” დამფუძნებელია.
„სითი ცენტრის“ 100%-იანი წილის მფლობელია კვიპროსში რეგისტრირებული კომპანია „სოფიცა ჰოლდინგს ლიმიტედი“ (SOFITSA HOLDINGS LIMITED). „სითი ცენტრ 2“- ის მფლობელი კი კვიპროსში რეგისტრირებული კომპანია „თრასდენ თრეიდინგ ეს.ეი.“-ია, დირექტორი გიორგი შეყრილაძე.
წლების წინ ბიზნესმენ რომან ფიფიას კომპანია „ლოიალ კაპიტალ გრუპში“ აცხადებდნენ, რომ „სითი ცენტრი“ მათი ჰოლდინგის ნაწილი იყო.
რომან ფიფიას კომპანია ყოფილი რესტორან „არაგვის“ ტერიტორიაზე თავდაპირველად სასტუმრო „ჰაიატის“ აშენებდა, რომელიც 2011-ში უნდა დასრულებულიყო, თუმცა ვადამ 2014 წლამდე გადაიწია, მაგრამ მშენებლობა აღარ გაგრძელებულა.
რამდენიმე წლის შემდეგ, „ლოიალ კაპიტალ გრუპმა“ ახალი პროექტი მოამზადა და მერიას დასამტკიცებლად წარუდგინა. კომპანიის ვიცე-პრეზიდენტი, მინდია გადაევი ამბობდა, რომ მრავალფუნქციურ კომპლექსში სასტუმრო, საცხოვრებელი ფართები და ფინანსური ცენტრი უნდა მოწყობილიყო, მაგრამ თბილისის მერიის მხარდაჭერა ამ პროექტმა ვერ მოიპოვა. მას შემდეგ პროექტი აღარ განახლებულა.
კომენტარები