რადიო თავისუფლების ცნობით, დაბა სურამის შემდეგ, მეწყრული პროცესები განვითარდა ხაშურის მუნიციპალიტეტის სოფელ ქვიშხეთშიც. მთიდან წამოსულმა მიწის მასამ სუთიაშვილების უბანში, საცხოვრებელ სახლებამდე მიაღწია. ორი ოჯახი უკვე ევაკუირებულია.
ხაშურის მუნიციპალიტეტში მეწყრული პროცესები 7 თებერვალს, ღამის 11 საათზე დაიწყო. დაბა სურამში, ზინდისის დასახლებაში მიმდებარე მთის ფერდობიდან მიწის მასა სახლებისკენ დაიძრა. ტალახმა, ქვა-ღორღმა და ხეების ფრაგმენტებმა გურამიშვილის ქუჩამდე მიაღწია.
ხაშურის მუნიციპალიტეტის მერიის ინფორმაციით, წუხელ უსაფრთხო ადგილზე, 40 ოჯახის გაყვანა მოხდა.
10 ევაკუირებული ოჯახი სასტუმროში განათავსეს. დანარჩენები კი ნათესავებმა შეიფარეს.
დილიდან ხაშურის მუნიციპალიტეტში მუშაობენ გარემოს დაცვის ეროვნული სააგენტოს სპეციალისტები. მათ მოინახულეს მეწყერსაშიში ადგილები, ის ფერდობი საიდანაც მიწის მასა წამოვიდა. ახლა მათ დასკვნაზეა დამოკიდებული მოახერხებენ, თუ არა ადგილობრივი მცხოვრებლები სახლებში დაბრუნებას.
„რაც მთავარია წუხელ დაწყებული პროცესი არ გაგრძელებულა. მიწის მასა შეჩერებულია და აღარ მოძრაობს. გეოლოგები არიან ჩამოსული და ადგილზე მუშაობენ და რასაც გვეტყვიან, იმის მიხედვით ვიმოქმედებთ. ყველაზე მთავარი მაინც ის იყო, რომ წუხელ აქ მცხოვრებლების ევაკუაცია განვახორციელეთ და ახლა ისინი უსაფრთხოდ არიან.“ – განაცხადა ხაშურის მუნიციპალიტეტის მერმა თენგიზ ჩიტიაშვილმა.
სურამელების ინფორმაციით ზინდისის დასახლებაში მეწყრული პროცესები 2007 წლის შემდეგ დაიწყო. მაშინ ადგილზე სპეციალისტებიც იყვნენ ჩასული. ტერიტორიის ნაწილი ე.წ წითელ ზონად გამოცხადდა, თუმცა, არაფერი შეცვლილა.
კომენტარები