,, ჩვენ ვცხოვრობთ ქვეყანაში სადაც ყოფილი ბანკირები მევახშეებს გმობენ” – თამარ ჩერგოლეიშვილი

,,ტაბულას” დამფუნებელი, თამარ ჩერგოლეიშვილი:

,,ვულგარული პოპულიზმის პასუხად:

1. ჩვენ უნდა ვიყოთ საზოგადოება სადაც ხალხი შიმშილით და სიცივით არ კვდება;

2. მაგრამ იმისთვის, რომ ვიქცეთ ასეთ საზოგადოებად – არ უნდა ვიყოთ ღარიბები;

3. იმისთვის, რომ არ ვიყოთ ღარიბები, გვჭირდება ხელმისაწვდომი ფული – რომელსაც ვისესხებთ და ჩავდებთ ბიზნესში, რომლითაც ვიყიდით ბინას …

4. რაც უფრო დიდ რისკთან იქნება ფულის სესხება, მით გაგვიძვირდება და გაგვირთულდება ფულის შოვნა ბიზნესის საკეთებლად, ან ცხოვრების ხარისხის გასაუმჯობესებლად;

5. საქართველოში ფულის სესხება ძვირია (უფასო ფული არ არსებობს და რაც “არსებობს”, იმ ფულსაც ფასი აქვს, მონობა)

6. ძვირია ყველასთვის, მათ შორის იმ ადამიანისთვის ვინც დღეს გამოასახლეს;

7. იმისთვის, რომ ფულის სესხება გაიაფდეს, გარდა ნატოში შესვლისა და გამდიდრებისა, გვჭირდება რომ ხალხმა ფული დააბრუნოს ამა თუ იმ ფორმით;

8. ქართული ოცნება სამარცხვინოა იმის გამო, რომ ამ თემით პოპულისტურად ისარგებლა, იპოთეკარებზე არარეალისტურ დაპირებები გასცა და შემდეგ, თავი რომ დაეძვრინა, რეგულაციები მიიღო რამაც მოქალაქეებს ფულის სესხება კიდევ უფრო გაურთულა და გაუძვირა.

9. ოპოზიციის უდიდესი ნაწილი სამარცხვინოა იმის გამო, რომ ქართული ოცნებისგან არაფრით განსხვავდება და აყროლებულ პოპულიზმს სთავაზობს ქართველ ამომრჩეველს ნაცვლად საღი აზრისა.

რომ შევაჯამო:

10. ნასესხებ ფულს უნდა დაბრუნება.

11. ფულის სესხება საქართველოში ღირს ძვირი ა) უსაფრთხოების რისკების გამო; ბ) სახელმწიფო რეგულაციებით ფულის ხელმისაწვდომობის ხელოვნური შეზღუდვის გამო; გ) ვალის ამოღებასთან დაკავშირებული რისკების გამო;

12. თუ გვსურს ძვირი არ ღირდეს, ვალის აღება და ამოღება კი არ უნდა გავართულოთ პოპულისტური ისტერიკით, პირიქით – ფულის გაცემა და ამოღება უფრო იოლი უნდა გავხადოთ და თავისუფალი სასამართლო შევქმნათ, რომლის მიმართაც ნდობა იარსებებს.

13. ჩვენ ვცხოვრობთ ქვეყანაში სადაც ყოფილი ბანკირები მევახშეებს გმობენ, მაგრამ მე ხომ ვიცი რომ ტაბულას თანამშრომლის შვილები ახალ წელს მშობლების უხელფასოდ დატოვებას სწორედ მევახშეებს გადაურჩენიათ, იმიტომ რომ ბანკები სესხს არ მაძლევდნენ მძიმე რეგულაციების და რეჟიმის წნეხის გამო.

14. ისიც ზუსტად ვიცი, რომ სულ რომ იატაკქვეშეთში მოუწიოთ მევახშეებს გადასვლა, მაინც გადამარჩენენ იმიტომ რომ რაზეც მოთხოვნა არსებობს, მიწოდება ყოველთვის ჩნდება.

15. უსახლკაროდ დარჩენილ ადამიანებზე, უკიდურესად გაჭირვებულ ადამიანებზე ღირსეულმა საზოგადოებამ უნდა იზრუნოს და ხელი გაუმართოს, მაგრამ ეს ბანკებზე და მევახშეებზე ძალმომრეობით და მეტი რეგულაციებით არ მიიღწევა – პირიქით, ეს ყველაფერი ფულის სესხებას კიდევ უფრო აძვირებს და გაჭირვებული ადამიანების ცხოვრებას კიდევ უფრო ამძიმებს.“