“თბილისში ვშიმშილობთ ძველებურად, ოღონდ გაგვაკონტროლებენ თანამედროვედ” – გიორგი თავდგირიძე

სამხედრო ექსპერტი, გიორგი თავდგირიძე:

არ დაიჯერებთ, მაგრამ თბილისში, შიმშილის დასამარცხებლად კი არ ვხარჯავთ რესურს, არამედ მის თანამედროვე ტექნოლოგიებით მოსაწესრიგებლად. ანუ ვშიმშილობთ ძველებურად, ოღონდ გაგვაკონტროლებენ თანამედროვედ. თბილისის მერია: “თბილისის მასშტაბით, უფასო სასადილოებში ბენეფიციართა აღრიცხვის ახალი სისტემა ამოქმედდა, რომლითაც ავტომატურად მოხდება უფასო სასადილოების ბენეფიციართა პერსონალური ინფორმაციის, კერძოდ, სოციალურად დაუცველის სტატუსის ცვლილების, შეჩერებისა თუ გაუქმების, გარდაცვალების, ოჯახის საიდენტიფიკაციო კოდის და ა.შ. ასახვა და განახლება. ამასთან, ახალი სისტემის დანერგვის შედეგად ზუსტად აისახება სასადილოში ბენეფიციართა დასწრება (სასადილოში გამოცხადების დღე, საათი, წუთი), საპატიო თუ არასაპატიო გაცდენები.”
ყველაფერი გაკეთდება, რომ ჩვენი შიმშილი იყოს კომფორტული, დაკვირვების ქვეშ და დისციპლინირებული. თბილისის მერია: “უფასო სასადილოების ტერიტორიაზე ვიდეოთვალი დამონტაჟდა. სასადილოები აღიჭურვნენ მობილური ტელეფონებით, ხოლო ბენეფიციარებისთვის პერსონიფიცირებული პლასტიკური ბარათები დამზადდა. მობილურ ტელეფონში ჩაწერილ აპლიკაციაზე პერსონიფიცირებული პლასტიკური ბარათის შეხებით ფიქსირდება ბენეფიციარის ვიზიტი სასადილოში, პარალელურად კი, ეს ინფორმაცია აისახება ბენეფიციართა აღრიცხვის ელექტრონულ ბაზაში.”
სოციალურად დაუცველებს რა ეშველებათ არ ვიცი, მაგრამ 1.35 თეთრიან კვების რაციონს, ხელოვნური ინტელექტი და მომსახურე პერსონალად ანდროიდება დააკვდება, დარწმუნებული ვარ.