პრემიერ-მინისტრ ირაკლი ღარიბაშვილის ხელმძღვანელობით, საქართველოს დემოგრაფიულ საკითხთა განმხილველი საბჭოს მორიგი სხდომა გაიმართა. ამის შესახებ ინფორმაციას მთავრობის ადმინისტრაცია ავრცელებს.
„საბჭოს წევრებმა განიხილეს აბორტის საგანგაშო სტატისტიკა. ხაზი გაესვა ამ მიმართულებით დამატებითი ღონისძიებების დაგეგმვის აუცილებლობას,“ – ნათქვამია ადმინისტრაციის მიერ გავრცელებულ განცხადებაში.
სტატისტიკის მიხედვით, ბოლო 10 წლის განმავლობაში ქვეყანაში რეგისტრირებული აბორტების ყველაზე დაბალი მაჩვენებელი 2021 წელს დაფიქსირდა. ამიტომ უცნობია, მთავრობა „საგანგაშო“ სტატისტიკაში რას გულისხმობს.
„პუბლიკის“ მიერ მოპოვებული ინფორმაციით, 2022 წელს საქართველოში რეგისტრირებული აბორტების რაოდენობა 16 619 იყო, აქედან ხელოვნური აბორტი – 10 446.
რეპროდუქციული ჯანმრთელობის მაჩვენებლების სტატისტიკის მიხედვით, რომელიც დაავადებათა კონტროლის ეროვნული ცენტრის გვერდზეა გამოქვეყნებული, რეგისტრირებული აბორტების ზრდის ტენდენცია არ დასტურდება, პირიქით, აბორტების კლების ტენდენცია ფიქსირდება. 2021 წელს ქვეყანაში რეგისტრირებულია 17 774 აბორტი, რომელთაგან ხელოვნური აბორტების წილი 62.7%-ს უდრიდა. წინა წელთან შედარებით, აბორტების საერთო რაოდენობა 7%-ით შემცირდა.
უცნობია, რატომ მიიჩნევს მთავრობა, აბორტების შემცირებას საგანგაშოდ, ან იქნებ, ხელისუფლებას არ აქვს წვდომა ოფიციალურ დოკუმენტებზე?
სრულად – პუბლიკა
ჯანდაცვის მინისტრის ბრძანებით აბორტის გაკეთების წესი იცვლება
კომენტარები