“საუდის არაბეთმა ისრაელზე ნასროლი რაკეტა თავად ჩამოაგდო, პალესტინელი ლტოლვილების მიღებაზე კი ყველა არაბულმა ქვეყანამ უარი თქვა” – ლაშა შაყულაშვილი

ამ კითხვას მარტივი პასუხი აქვს.

არაბულ ენას და ტერმინოლოგიას, ამ ომში, იმაზე დიდი ძალა აქვს, ვიდრე ოდესმე წარმოვიდგენთ.

ზოგადად, ომში, ენა და ტერმინები იდეოლოგიურ განსხვავებზე მეტს გვიყვება. ახლა ძალიან მარტივ მაგალითს მოვიყვან: მაგ. აფხაზები და რუსები, რუსულად, სოხუმისათვის Сухум-ის დაძახებას ითხოვენ, როცა ქართველები Сухуми-ს ვამბობთ. იგივეა Гал/Гали, Цхинвал/Цхинвали. დღემდე, ათენის აეროპორტი ერთადერთი ადგილია, სადაც ფრენები არა სტამბულის, არამედ კონსტანტინოპოლის მიმართულებით სრულდება.

ისრაელ-ჰამასის ომის პირველივე დღიდან კი ჰამასის მიერ გამოყენებული არაბული ტერმინოლოგია არა დიალექტების, არამედ ექსტრემისტული იდეოლოგიის დონეზე გაიშალა.

ჩემზე კარგად მოგეხსენებათ, რომ არსებობს ლიტერატურული არაბული და თავად სახელმწიფოები კი თავიანთ დიალექტებზე მეტყველებენ. პალესტინური არაბული ისრაელის სკოლებსა და სხვადასხვა დაწესებულებებში შეუფერხებლად ისწავლება. ამ არაბულზე საუბრობს ისრაელის მოქალაქე – არაბი, დრუზი და ადამიანი, რომელიც საკუთარ თავს ისრაელში მცხოვრებ პალესტინელად მოაზრებს. პალესტინურ არაბულზე საუბრობს მთელი პალესტინური ავტონომიის მოსახლეობა – ბეთლემი, რამალა, ნაბლუსი, ხევრონი და ღაზა.

ახლა, არაბული ენის გავლენას – სოციალური ქსელები და მასში უკონტროლოდ გავრცელებული ექსტერმისტული ვიდეო მიმართვები დაუმატეთ.

წარმოიდგინეთ, ღაზის სექტორში, სახელმწიფო ტელევიზიის ეთერით გამოდის სასულიერო ან პოლიტიკური თანამდებობის მქონე პირი და საღვთო ომს აანაონსებს. ამ ომში კი პირველ რიგში იმ ეთნიკურ არაბებს და პალესტინელებს ემუქრება, რომლებიც ჰამასს გვერდით არ დაუდგებიან. ამას კი ისრაელელი არაბი უყურებს და გული უსკდება. ამას უყურებს რეგიონში მცხოვრები სხვა არაბი და ხვდება რომ ეს იდეოლოგია მის ქვეყანას მოსპობს.

სამყარომ უნდა გაიგოს რომ არც 1967 წელია და არც 1973.

არაბულ სამყაროს სურს განვითარება, დასავლეთთან ეკონომიკური კავშირები და თანამშრომლობა – მათ შორის ისრაელის სახელმწიფოსთან. რამდენიმე წლის წინ დუბაიში სინაგოგაც კი გაიხსნა. ჰამასმა კი საავადმყოფოზე ვითომ ისრაელის მიერ მიტანილი იერიშით იორდანიის მეფეს ისტორიული შეხვედრა ჩააშლევინა, სადაც ბაიდენი, პალესტინის ლიდერი აბასი, იორდანიის და ეგვიპტის ლიდერები უნდა ყოფილიყვნენ. ამ ყველაფერს ძალიან კარგად აცნობიერებს არაბული სამყარო!

ისრაელისათვის ამერიკული სამხედრო დახმარების ნაწილი ემირატებში დგას. ეგვიპტე და ისრაელი მოკავშირეები არიან. საუდის არაბეთმა იემენიდან ისრაელზე ნასროლი რაკეტა თავად ჩამოაგდო. პალესტინელი ლტოლვილების მიღებაზე კი ყველა არაბულმა ქვეყანამ უარი თქვა. რაბათში, მოროკოში, მშვიდობის მოთხოვნის აქციაც კი გაიმართა, სადაც ადამიანები პალესტინის და ისრაელის დროშებით ერთად გამოვიდნენ.

არაბული სამყარო კარგად იცნობს ჰამასის და ჰეზბოლას ექსტრემისტულ ძალებს. არაბული ქვეყნები საკუთარ მშობლიურ ენაზე უსმენენ ჰამასის მუქარას და მათი სამართლის ქვეშ იძულებით ცხოვრების ანონსს. უსმენენ და ისრაელზე მეტად ეშინიათ.

არც რუსეთს, არც ირანს და არც ტერორიზმთან მოფლირტავე სხვა რომელიმე ძალას გამოუვა შუა აღმოსავლეთში დიდი ომის გაჩაღება, პირიქით, სხედან და საგონებელში არიან იმითი, რომ ევროპა-ამერიკაში უფრო გამოიყვანეს ხალხი, ვიდრე არაბულ ქვეყნებში!

აი, ეს მოაქვს უმეცრებას და ბოროტებას! სამყარო ისრაელის და სინათლის მხარეს დგას, რაც პირველ რიგში, შვებას, პალესტინელ ხალხს მოუტანს!

עם ישראל חי