ბათუმში მოკლული ნიკა თუთაშვილის ახლობლების განცხადებით, არსებობს მომხდარი დანაშაულის ვიდეოკადრები, თუმცა ამის მიუხედავად, მოსამართლემ დღეს ბრალდებული მაინც გაამართლა – “ვიდეოჩანაწერები არის, როგორ გამოასალმეს სიცოცხლეს 24 წლის ორმეტრიანი ბიჭი… შეცვალეს ჩვენებები. ვიდეოკადრებში რაც არის სიმართლე, იმ ვიდეოს თან უყურებენ და თან სიცრუეს ამბობენ”– თქვა სასამართლო პროცესის დასრულების შემდეგ მოკლულის ნათესავმა.
შეგახსენებთ, ბათუმის სასამართლოს მოსამართლის, კოტე ჭილაიას გადაწყვეტილებით, დანაშაულში ბრალდებული ლევან სირაბიძე გამართლდა და 8 თვიანი პატიმრობის შემდეგ, გათავისუფლდა.
ნიკა თუთაშვილის ოჯახის წევრების განცხადებით, სირაბიძე “ქართული ოცნების” ბათუმის საკრებულოს წევრის, რიჩარდ სირაბიძის ახლო ნათესავია და ვარაუდობენ, რომ გამამართლებელი განაჩენიც სწორედ ამ ფაქტს უკავშირდება.
ბათუმში მოკლული ნიკა თუთაშვილის დედა ამბობს, რომ დღევანდელი განაჩენი, რომლითაც მისი შვილის მკვლელობაში ბრალდებული ლევან სირაბიძე გამართლდა, წინასწარ იყო მიღებული.
“უსამართლო ქვეყნის უსინდისო კანონების მონები დავინახე კიდევ ერთხელ. დარტყმიდან 7 წუთში, ლევან სირაბიძე სასწრაფოში კი არ რეკავს, ურეკავს რიჩარდ სირაბიძეს, მის ბიძაშვილს და ეუბნება – ასე გავაკეთე. ის ეუბნება პასუხად, ჩაბარდი და ყველანაირად გიპატრონებ და დღეს მოწმეები იყავით ყველა, რომ უპატრონა.” თქვა სასამართლო პროცესის დასრულების შემდეგ მოკლული ახალგაზრდის, ნიკა თუთაშვილის დედამ.
კომენტარები