ფინანსთა სამინისტრო ქონების გადასახადის რეფორმაზე მუშაობს. ყოველწლიური გადასახადი შემოსავლის მიხედვით აღარ განისაზღვრება. ამის შესახებ ფინანსთა მინისტრის მოადგილე გიორგი კაკაურიძემ BM.GE-ს კითხვის საპასუხოდ განაცხადა.
მისი თქმით, რეფორმის კანონპროექტს უწყება სავარაუდოდ საგაზაფხულო სესიაზე გაიტანს, ამ ეტაპისთვის კი მიმდინარეობს რეფორმის ზეგავლენის შეფასება, რასაც მუნიციპალიტეტებთან კონსულტაციები მოჰყვება.
„ქონების გადასახადს რაც შეეხება, ჯერჯერობით, კანონპროექტი ინიცირებული არ არის, თუმცა მზადდება და პროექტის სახით უკვე არსებობს, მიმდინარეობს მისი ზეგავლენის შეფასება, ე.წ. RIA, რაც მთავარი პრინციპია აქ იქნება არა შემოსავალზე დაფუძნებული, არამედ ქონების მთლიან ფართობზე. ეს კომპანიებისთვის გაცილების მნიშვნელოვანია და ზოგადად ეკონომიკურად უფრო სწორი მიდგომაა. ამას დეტალურად, სავარაუდოდ საგაზაფხულო სესიაზე გავიცნობთ, მანამდე საბოლოო გადაწყვეტილებები სამინისტროს დონეზე, შემდეგ მთავრობაზე, იქნება საჭირო კონსულტაციები მუნიციპალიტეტებთან და ქონების გადასახადის რეფორმასთან დაკავშირებით დეტალურად საუბარი, ვფიქრობ, გაზაფხულზე შეგვეძლება“, – ამბობს გიორგი კაკაურიძე.
ფინანსთა მინისტრის მოადგილე რეფორმის დეტალებზე არ საუბრობს, თუმცა ამბობს, რომ დღეს არსებული მიდგომა სწორი არ არის და შესაძლოა, ის ქონების ფართის მიხედვით განისაზღვროს.
„ახალი რეფორმის მიხედვით ქონების გადასახადი შემოსავალზე არ იქნება დამოკიდებული. ეს იქნება დამოკიდებული იმ ფართზე, რომელიც კომპანიებს თუ ფიზიკურ პირებს ექნებათ.
ალბათ კონკრეტული ზონების მიხედვით, კონკრეტული კვადრატულის ღირებულებაა დადგინდება… დეტალებზე საუბარი ჯერ ძალიან ადრეა, რადგან საჭიროა შეფასება და მუნიციპალიტეტებთან კონსულტაციებია გასავლელი.
დღეს რა პრობლემაცაა 40 000-ლარიანი ზღვარია. ეს არ არის სწორი შეფასების მეთოდი, რადგან შესაძლოა საქართველოში საერთოდ არ ჰქონდეს შემოსავალი, სხვა ქვეყანაში ჰქონდეს შემოსავალი, მეორე მხრივ შეიძლება შემოსავალი საერთოდ არ უფიქსირდებოდეს, მაგრამ დიდი ქონების პატრონი იყოს, ამიტომ ქონების გადასახადი სხვა შინაარსის უნდა იყოს“, – განაცხადა მინისტრის მოადგილემ.
წყარო: „ბიემჯი“
კომენტარები