თბილისში, პიკის საათებში, დიდი ავტომობილების გადაადგილების შეიზღუდება – ვის არ შეეხება შეზღუდვა?

თბილისში, კონკრეტულ უბნებში, 2024 წლის 1-ლი იანვრიდან, პიკის საათებში, დიდი გაბარიტების მქონე ავტომობილების გადაადგილების შეზღუდვა იგეგმება.

მერია განიხილავს, რომ თბილისის მუნიციპალიტეტის ადმინისტრაციულ საზღვრებში საერთო სარგებლობის საავტომობილო გზებზე აიკრძალოს, M3, N2 და N3 კატეგორიების სატრანსპორტო საშუალებების მოძრაობა, დილის 08:00 საათიდან 11:00 საათამდე და საღამოს 17:00 საათიდან 20:00 საათამდე შუალედში.

მერმა, კახი კალაძემ თქვა, რომ შეზღუდვა არ იმოქმედებს შაბათ-კვირას, ასევე, აგვისტოს თვეში, როცა ქალაქი მეტ-ნაკლებად დაცლილია.

“დღეს პიკის საათში 600 000-ზე მეტი კერძო ავტომობილი გადაადგილდება. რა თქმა უნდა, ეს ძალიან დიდი ციფრია და აღნიშნული რაოდენობა ქმნის ე.წ. საცობებს, განსაკუთრებით პიკის საათებში ჭირს გადაადგილება, თუმცა არის ასევე პრობლემა, რომ ამ საცობებში პიკის საათებში ხშირად ვხვდებით დიდ სატვირთო ავტომობილებს, რომელიც ასევე უდიდეს პრობლემას წარმოადგენს თავიანთი გაბარიტებით, მოცულობით, კიდევ უფრო აფერხებს გადაადგილებას და ზრდის საავარიო სიტუაციების ალბათობას. რაც თავის მხირვ ხანგრძლივად აფერხებს საგზაო მოძრაობას.

ამ პრობლემის დასაძლევად ვფიქრობთ, რომ ერთ-ერთ მნიშვნელოვანი ნაბიჯი იქნებოდა დიდი გაბარიტების მქონე ავტომობილების გადადგილების შეზღუდვა პიკის საათებში. […] ეს მთელ თბილისს არ მოიცავს, საუბარია კონკრეტულ მონაკვეთებზე, უბნებზე, სადაც ყველაზე მეტი დატვირთვა და საცობი არის პიკის საათებში. საბოლო გადაწყვეტილება ჯერ არ მიგვიღია, ვთანამშრომლობთ ბიზნეს სექტორთან. ძალიან კარგად გვესმის, რომ ეს მარტივი ვერ იქნება, ეს არის სხიალე და ვფიქრობთ, რომ მომავლი წლის იანვრიდან ავამოქმედოთ ეს გადაწყვეტილება, რომელიც საბოლოოდ შეთანხმდება ყველა ბიზნეს სექტორთან იქნება გავლილი”, – თქვა კალაძემ.

კახა კალაძის თქმით რეგულაცია არ გავრცელდება:

• გამონაკლისი იქნება საზოგადოებრივი ტრანსპორტი;
• არაგეგმური საავარიო და სიცოცხლის/ჯანმრთელობის საფრთხის შემთხვევების აღმოსაფხვრელად საჭირო ტრანსპორტი;
• მუნიციპალური ან სახელმწიფო ინფრასტრუქტურული პროექტების განხორციელებისათვის საჭირო ტრანსპორტი;
• მოსწავლეების და სტუდენტების გადაადგილებისთვის საჭირო ტრანსპორტი;
• ტურისტული საქმიანობის განხორციელებისთვის საჭირო ტრანსპორტი და ა.შ.

მერის თქმით, საზოგადოებას მომდევნო დღეებში მიაწვდიან დეტალურ ინფორმაციას, თუ რა გადაწყვეტილება იქნება საბოლოოდ მიღებული.