რაში წაახალისა ზურაბიშვილმა ლატვიის პრეზიდენტი? – მთავრობის ვარაუდი და კობახიძის განცხადება

ქართული ოცნების თავმჯდომარე, ირაკლი კობახიძე, საკონსტიტუციო სასამართლოს იმ სხდომაზე, სადაც პრეზიდენტის იმპიჩმენტის საკითხი განიხილება, ამბობს:

პრეზიდენტის მიერ ლატვიაში ვიზიტი როცა შედგა, გაკეთდა ლატვიის პრეზიდენტის მხრიდან განცხადება, როგორიც ძალიან დიიდი ხანია არ გაკეთებულა, წელიწადნახევარია, ჩვენ არ გვთხოვენ სანქციების დაწესებას და პრეზიდენტ ზურაბიშვილთან შეხვედრის შემდეგ, გამოდის ლატვიის პრეზიდენტი და ამბობს, საქართველომ უნდა დაუწესოს რუსეთის ფედერაციას სანქციები. ამას არავინ ითხოვს ჩვენგან. რატომ არ გაკეთდა ასთი განცხადებები მას შემდეგ, რაც პრემიერი შეხვდა, რომელიმე ოფიციალურ პირს? იმიტომ რომ სხვა რამეებს შეეხებოდა მოლაპარაკებები. ლატვიის პრეზიდენტი აკეთებს ისეთ განცხადებას, რომელიც მთვარობის პოზიციასაც ეწინააღმდეგება და რასაც არ ითხოვს ჩვენი არც ერთი პარტნიორი. პირდაპირ ჩვენ ეროვნულ ინტერესებს დაუპირისპირდა შედეგობრივად ეს განცხადება, სანქციების დაწესეა რუსეთისთვის ნიშნავს ჩვენი ეკონომიკის, პირველივე წელს, მინიმუმ 10 პროცენტით შემცირებას, ჩვენ ვარაუდი გვაქვს, რომ პრეზიდენტმა სათანადო ზომები არათუ არ მიიღო, ასეთი განცხადების პრევენციისთვის, არამედ შეიძლება წაახალისა კიდეც ასეთი განცხადება. მთავრობის გადასაწყვეტია, მთავრობაა პასუხისმგებელი. დღემდე არ ვიცით, სალომე ზურაბიშვილი მომხრეა, თუ არა სანქციების, მისი განცხადებები ორაზროვანია.

შეგახსენებთ, ბოლო პერიოდში, მთავრობა ძალიან ხშირად ამბობს, რომ საქართველოს სანქციების დაწესებას და ომში ჩართვას სთხოვენ, რაც, როგორც დღეს ირაკლი კობახიძემ განაცხადა, თურმე, სიმართლეს არ შეესაბამებოდა.