იტალიელმა კაცმა მე-5 სართულიდან გადმოვარდნილი 3 წლის ბავშვი დაიჭირა და გადაარჩინა. ინფორმაციას უცხოური მედია ავრცელებს.
37 წლის ტურინელ მატია აგუზის მთელი ქვეყანა გმირს მას შემდეგ უწოდებს, რაც 3 წლის ბავშვი სასწაულებრივად გადაარჩინა. მატია შაბათ დილით შეყვარებულთან ერთად პურის მაღაზიიდან შინ ბრუნდებოდა, როცა ყვირილი გაიგონა. მატიამ ზემოთ აიხედა და მე-5 სართულის აივანზე ბავშვი დაინახა, რომელიც ვარდებოდა.
„კაცის ყვირილი გავიგონე, რომელმაც აივანზე პატარა გოგო დაინახა. პატარა გოგო ქუჩისკენ სულ უფრო და უფრო იხრებოდა, ფეხები ჰაერში ჰქონდა და თავს მხოლოდ ხელებით იჭერდა. თავიდან მეც ყვირილი დავიწყე და ბავშვს მივუთითებდი, რომ უკან დაბრუნებულიყო, თუმცა მას ჩვენი არ ესმოდა. როცა მივხვდი, რომ ვარდებოდა, დავდექი, თვალები დავხუჭე და იმედი მქონდა, რომ ყველაფერი კარგად დასრულდებოდა. დარტყმის სიძლიერე შევამცირე და ორივე მიწაზე დავეცით”, – განაცხადა მატიამ.
37 წლის გმირის თქმით, თავიდან ბავშვს სიცოცხლის არაფერი ეტყობოდა, შემდეგ კი ატირდა და თავადაც შვებით ამოისუნთქა. ახლა ბავშვი თავს კარგად გრძნობს, მატია კი პატარას გადარჩენის პროცესში დაშავდა და ამ ეტაპზე საავადმყოფოში რჩება.
ტურინის მერმა მატიას გმირი უწოდა და განაცხადა, რომ როგორც საპატიო მოქალაქე, ის მალე დაჯილდოვდება. მატიას თქმით კი, გმირის წოდებას არ იმსახურებს, რადგან ეს ყველაფერი ბუნებრივად მოხდა.
კომენტარები