,, ასე რომ, მსოფლიოში ყველაზე მატყუარა კვლავ “ქართული ოცნება” გამოდის” – რას წერს რომან გოცირიძე

პარალმენტარი რომან გოცირიძე:

,,როგორც იქნა, დათვალეს ხმები ზიმბაბვეში, სადაც საპრეზიდენტო და საპარლამენტო არჩევნები გაიმართა. ქვეყნის პრეზიდენტი კვლავ მეგრული გვარის მქონე ყოფილი პრეზიდენტი, ემერსონ მნანგავა გახდა. როგორც იცით, იგი დაჰპირდა ხალხს, რომ ვინც ხმას მას და მის პარტიას მისცემდა, სამოთხეში მოხვდებოდა. თანაც ასპროცენტიან გარანტიას იძლეოდა. დაუჯერა ხალხმა.

ამაზე ძლიერი საარჩევნო დაპირება არჩევნების ისტორიაში არ ყოფილა მეთქი, დავწერე რამდენიმე დღის წინ. ეს გააპროტესტა მკითხველთა ერთმა ნაწილმა-როგორ გეკადრებათ, აბა კარგად გაიხსენეთ, რას ჰპირდებოდა ხალხს 2012 წლის არჩევნებში “ქართულ ოცნებაო”? ერთი-ორი მაგალითიც შემახსენეს და მივხვდი, რომ ვცდებოდი და აი რატომ:

დაპირება პირველი-საქართველოში დაახლოებით 3600 სოფელია, ოკუპირებული სოფლების გარეშე. თითო სოფელს თუ 5 მილიონ დოლარს მივცემთ, გამოდის 18 მილიარდი დოლარი. ეს დაპირებისდროინდელი კურსით 30 მილიარდი ლარია, რაც მაშინდელი ოთხი წლის ბიუჯეტის ტოლია. რამდენი პროცენტია ამ დაპირების შესრულების ალბათობა? რა თქმა უნდა, ნული პროცენტი.

ახლა “ჩავაანალიზოთ” მეორე დაპირება, ე. წ. “უფასო ფულის” შესახებ. როგორც ქალბატონი მარგარეტ ტეტჩერი ამბობდა, უფასო ყველი სათაგურშიც კი არ არისო. თუ ეს სიმართლეა და სიმართლეა რა თქმა უნდა, აბა ბაზარში ვინ მოგცემს ყველს უფასოდ იმის გამო, თაგვების შემოსატყუებლად რომ გჭირდება, უნდა გადაიხადო, აბა რა. საწყალი თაგვი კი ამ ყველის ნაჭერში სიცოცხლის ფასს იხდის. რამდენი პროცენტია ქართული ოცნების ამ დაპირების შესრულების ალბათობა? ნული, რა თქმა უნდა.

ახლა ზიმბაბვის პრეზიდენტის საარჩევნო დაპირებას მივუბრუნდეთ, როცა ამბობს, რომ ყველა მისი ამომრჩეველი სამოთხეში მოხვდება. განა თეორიულად ყოველი მეორე ადამიანი მაინც არ მოხვდება სამოთხეში? საკმაოდ პატიოსანი დაპირება მიუცია იმ კაცს. ჯანდაბას, ყოველი მეოთხე მაინც ხომ მოხვდება? გამოდის, დანაპირების შესრულების ალბათობა 25 პროცენტი მაინცაა.

ასე რომ, მსოფლიოში ყველაზე მატყუარა კვლავ “ქართული ოცნება” გამოდის.?”