ქალაქ სერგიევ პოსადში მდებარე ზაგორსკის ოპტიკურ და მექანიკურ ქარხანაში, რომელიც მოსკოვის ცენტრიდან დაახლოებით 40 მილის (65 კმ) დაშორებით მდებარეობს, აფეთქება მოხდა. შედეგად 50-ზე მეტი ადამიანი დაშავდა. ამის შესახებ CNN წერს.
„სულ 56-მა ადამიანმა ითხოვა სამედიცინო დახმარება. 30 ახლა საავადმყოფოშია, მათგან ექვსი ინტენსიური თერაპიის განყოფილებაშია“, – დაწერა მოსკოვის რეგიონის გუბერნატორმა ანდრეი ვორობიოვმა Telegram-ზე.
დაღუპულთა შესახებ ოფიციალურად ინფორმაცია არ ვრცელდება, თუმცა როგორც Telegram არხი წერს, აფეთქების ადგილზე 10 ცხედარია ნაპოვნი და ეს რიცხვი კიდევ შეიძლება გაიზარდოს.
ქარხანაში აფეთქება 8 აგვისტოს, ადგილობრივი დროით დაახლოებით 10:40 საათზე მოხდა. ქარხანა რუსეთის სამხედრო, სამართალდამცავი ორგანოების, მრეწველობისა და ჯანდაცვისათვის ოპტიკურ და ოპტოელექტრონულ მოწყობილობებს აწარმოებდა.
კომენტარები