„გადაიხადა ვიღაცამ ფული, ჩაუძმაკაცდა ვიღაც მოხელეს, ვიღაც ,,კრიშას,, და ჩადგა კოტეჯი თუ სახლი იქ, სადაც არ უნდა ჩაედგა“ – იაგო ფრანგიშვილი

გერმანიაში მოღვაწე ქართველი ექიმი, იაგო ფრანგიშვილი:

„რათქმაუნდა სამაშველო სწრაფი და ტექნიზირებული კორპუსი უმნიშვნელოვანესია.
მაგრამ ამ ტელევიზიებს, ჟურნალისტებს, პოლიტიკოსებს, აი ამ თემის გარდა რომ სხვას ვითომდა ვერაფერს ხედავთ, გთხოვთ და მოგმართავთ, დაინახეთ უმთავრესი?
თანაც, ზაზა მესხის და მის ოჯახს ბევრი იცნობდით, პიროვნულად იცნობდით, იცოდით რა უაღრესად კეთილშობილი, უაღრესად მოკრძალებული, უაღრესად კულტურული, არასოდეს თქვენზე ცუდი სიტყვის ერთხელაც კი მთქმელი ადამიანი რომ არ იყო, თქვენს მეგობრად რომ თვლიდა თავს და თქვენ რომ მის მეგობრად თვლიდით თავს, აი იმ ადამიანებს მინდა მივმართო. იმათ ადამიანობის პასუხისმგებლობას მინდა მივმართო, იმათ პროფესიონალურ პასუხისმგებლობას მინდა მივმართო.
ისაუბრეთ უმთავრეს პრობლემაზე.
ვეტმფრენი არაა უმთავრესი.
ღვარცოფი და მეწყერი, ყველამ ვიცით რაცაა, მიწა და ღორღია წყალში აზელილი და ის რომ თავზე გადაგივლის, ძნელია თავი გაითავისუფლო.
სანამ ჯერ კიდევ არ გამყარებულა, სანამ ჯერ კიდევ წვიმს, მანამ სულ რამდენიმე საათი არსებობს ვინმეს გადარჩენისა, მინიმალურზე მინიმალური შანსი.
აი ის ღვარცოფი რომ გაჩერდება და გამყარებას დაიწყებს, მერე გაქვს მაქსიმუმ 5 წუთი. დიახ 5 წუთი რომ ადამიანი ჯერ იპოვო და მერე გადაარჩინო.
მეწყერი არაა მიწისძვრა და მეწყერი არც წყალდიდობაა და არც თოვლის ზვავია, როცა რამეს გამოეკიდები ან რაიმეს ქვეშ დაიმალები.
მეწყერი, ესაა თხევადი ბეტონი, რომელიც როგორც კი გამყარებას დაიწყებს, არის დაღუპვა 5 წუთში.
ამიტომაც აუცილებელია პრევენცია.
ამიტომაც აუცილებელია რომ სპეციალისტმა განსაზღვროს, სად უნდა იდგეს სახლი, სასტუმრო თუ კოტეჯი.
ამიტომაც აუცილებელია რისკის ანალიზები, სადაა მდინარე და მისი კალაპოტები, მისი სავარაუდო კალაპოტები. სადაა ტყე და მთა.
აი ესაა პრობლემა.
გადაიხადა ვიღაცამ ფული, ჩაუძმაკაცდა ვიღაც მოხელეს, ვიღაც ,,კრიშას,, და გადაიხადა ფული, ჩადგა კოტეჯი თუ სახლი იქ, სადაც არ უნდა ჩაედგა.
თან ხედისათვის ისე, სხვათაშორის ხეებიც დაჭრა.
არ გადაიხადა ვიღაცამ საერთოდ არაფერი, ისე იჩუქა გასაყიდად ტყე, გაჭრა და დააწყო მდინარის პირას.
მერე მოწვიმა.
მერე ხეებმა მდინარის კალაპოტი ჩახერგა.
სამი დღეს იწვალა მდინარემ, დაშრა სამი დღე ძველი კალაპოტი წვიმის მიუხედავად და მდინარე სადღაც ყოფილ თუ ძველისძველ თუ ახალ შესაძლო კალაპოტში დაგუბდა,
აი იმ ადგილას, რომელიც წესით და რიგით უნდა გამოეკვლია სპეციალისტს, უნდა შეედგინა დასკვნა, რომ იმ რეგიონში ფედობზე ტყის გაჩეხვა არ შეიძლება.
აი ესაა პრობლემა.
გაუმაძღრობა და ბუნების გაყვლეფაა პრობლემა.
ქვეყნის არ მოვლაა პრობლემა.
ფულისთვის, სახლისთვის, ხედისთვის ელემენტარულ ეკოლოგიაზე არ ფიქრი და არ ზრუნვაა პრობლემა.
აქ ყველაა პაასუხისმგებელი.
კოტეჯი რომ ააშენე, სასტუმრო რომ ააშენე და საამშენებლო მასალა რომ იქ მოჭერი, რომელიც შენი დამცავი ტყე უნდა ყოფილიყო რომ ის ფერდი მერე თავზე არ დაგმხობოდა, აი იქედან იწყება დანაშაული.
მეგობრებმა მაინც
საქართველოში მყოფმა ზაზა მესხის მეგობარმა ჟურნალისტებმა მაინც ისაუბრეთ მნიშვნელოვანზე, უმთავრესზე, პრობლემის საფუძველზე.
დიახ, ახლაა სწორედ ამის დრო,
ახლაა სწორედ ჯერ ოკუპირებული თავების გათავისუფლების დრო, რამეთუ ოკუპირებული აზროვნების გათავისუფლებიდან იწყება ოკუპირებული ქვეყნის გათავისუფლება.
ვითომდა თქვენი სისხლი და ხორცი, თქვენი ქმარი და ცოლი, თქვენი სამი შვილი ყოფილიყოს მსხვერპლი, აი ასე და ამ ტკივილით, ამ ბრაზით და აქედან გამომდინარე სამართლიანობის სურვილით გააკეთეთ თქვენი პროფესიული საქმე და მოიძიეთ ის, რაც უმთავრესია.“