“ქართული ოცნების” თავმჯდომარე ირაკლი კობახიძე შოვში მომხდარ სტიქიასთან დაკავშირებით აცხადებს, რომ აჯობებს ამაზე სპეციალისტებმა და ექსპერტებმა ისაუბრონ.
თუმცა, კობახიძის თქმით, წინა დღეების განმავლობაში შოვში წყლის დონის მატება ან კლება არ დაფიქსირებულა.
“რაც შეეხება შეფასებებს, ანალიზებს და ა.შ. აჯობებს, რომ ამაზე ისაუბრონ სპეციალისტებმა. რა თქმა უნდა, ჩვენ გვაქვს ჩვენი ინფორმაცია, სხვადასხვა ინფორმაცია ყველაფერთან დაკავშირებით, თუმცა, ჯობია, რომ სპეციალისტებმა, ექსპერტებმა, კომპეტენტურმა ადამიანებმა ისაუბრონ ჩვენს მაგივრად ამ ყველაფერზე.
რაც შეეხება წყლის დონეს, რაზეც იყო უამრავი სპეკულაცია თითქოს წინა დღეებში ჯერ ითქვა, რომ იყო მომატებული, მერე ითქვა, რომ საერთოდ არ მოდიოდა მდინარე, იყო მინიმუმამდე დასული წყლის დონე, ეს ყველაფერი გაირკვა, რომ იყო სპეკულაციები ერთი მარტივი მიზეზის გამო, წყალმზომები აფასებენ რეალურად, წყალმზომებით იზომება, რეალურად წყლის დონე და არცერთი დღის განმავლობაში, წინა დღეების განმავლობაში და არც იმ დღეს, თუ არ ჩავთვლით უშუალოდ სტიქიის წუთებს, არ დაფიქსირებულა არც წყლის დონის მატება, არც კლება,” – თქვა კობახიძემ.
ცნობისთვის, შოვში მეწყერი 3 აგვისტოს ჩამოწვა. ამ დროისთვის არსებული ოფიციალური მონაცემების მიხედვით, რაჭაში სტიქიიას 18 ადამიანი ემსხვერპლა. ადგილზე სამძებრო-სამაშველო სამუშაოები გრძელდება. მაშველები 17-მდე ადამიანს ჯერ კიდევ ეძებენ.
კომენტარები