ჯგუფში „ვეძებ“ მორიგი დანაშაულის შემცველი პოსტი ვრცელდება. როგორც ირკვევა, მოქალაქემ, რომელიც საკუთარ, გაშვილებულ შვილს ეძებდა, დისშვილს მიაგნო. მაშინ, როცა წლების წინ უთხრეს, რომ ბავშვი სუსტი დაიბადა და დაიღუპა.
„ვეძებ შვილს და ტესტით ვიპოვე დისშვილი, არც კი გვიფიქრია ოჯახში, რომ ის შეიძლებოდა ცოცხალი ყოფილიყო. პირველი შვილი დაიბადა ვადაზე ადრე, მცირე წონით და გვითხრეს, იმდენად უსუსური იყო, ვერ გადარჩაო… 1988 წელს.
11 წლის შემდეგ გარდაიცვალა ჩემი და და დარჩა 4 მცირეწლოვანი შვილი… წუხელ გვიან ღამით ტესტის პასუხი ვნახეთ და პირველი რიგის ნათესავად ამომივიდა რ.მ. წარმოდგენაც არ მქონდა, რომ ის ჩემი დისშვილი იქნებოდა.
დღეს საუბარიც შედგა ჩვენს შორის. ძალიან დიდი ემოციების ქვეშ ვართ. უღრმესი მადლობა ია ყველაშვილს და ჯგუფის ყველა წევრს, ასეთი უდიდესი და უანგარო შრომისთვის. საოცარი შეგრძნებაა, კვალზე გასვლა და პოვნა…
მინდა, ყველას ვინც ეძებს გისურვოთ სასურველი ადამიანების პოვნა და ჩახუტება. ტესტი რომ არ გამეკეთებინა, ვერასდროს ვიპოვიდი და არც მეცოდინებოდა, რომ ცოცხალია…“ – წერს პოსტის ავტორი.
კომენტარები