რა იარაღიდან ისროდა სინამდვილეში პოლიციელი და ვისთან ერთად იყო სროლის მომენტში?

პროკურატურამ საქართველოს შინაგან საქმეთა სამინისტროს თანამშრომელს, ს.გ.-ს ბრალდება არაპირდაპირი განზრახვით მკვლელობის მუხლით წარუდგინა, – აცხადებენ მთავარ პროკურატურაში. საუბარია ვაჟა-ფშაველას გამზირზე მომხდარ ფაქტზე.

„თბილისის პროკურატურამ საქართველოს შინაგან საქმეთა სამინისტროს თანამშრომელს ს.გ.-ს ბრალდება განზრახ მკვლელობის მუხლით წარუდგინა. საქმეზე ჩატარებული გამოძიებით დგინდება, რომ 2020 წლის 19 აპრილს, ს. გ. იმყოფებოდა თავის საცხოვრებელ ბინაში, დაახლოებით 21:00 საათზე, ალკოჰოლური სიმთვრალის მდგომარეობაში მყოფი ს.გ. გავიდა საცხოვრებელი ბინის აივანზე და როდესაც ქვეყანაში გამოცხადებული იყო საგანგებო მდგომარეობა და მოსახლეობის აბსოლუტური უმრავლესობა იმყოფებოდა საცხოვრებელ სახლებში, თავისი კუთვნილი „ვიკინგის“ მოდელის ცეცხლსასროლი იარაღიდან განახორციელა რამოდენიმე გასროლა საცხოვრებელი კორპუსების მიმართულებით. შედეგად, ს. გ.-ის მიერ ცეცხლსასროლი იარაღიდან გასროლილი ერთ-ერთი ტყვია თავის არეში მოხვდა საკუთარ საცხოვრებელ ბინაში,  მყოფ- თ. ა.-ს, რომელიც მიღებული ცეცხლნასროლი ჭრილობის შედეგად გარდაიცვალა.

საქმეზე ჩატარდა ათეულობით საგამოძიებო და საპროცესო მოქმედებები. მათ შორის  შემთხვევის ადგილის დათვალიერება,  ბრალდებულის საცხოვრებელი ბინის ჩხრეკა, საიდანაც  ამოღებული იქნა გასროლილი ტყვიის 13 მასრა და ს.გ.-ს საკუთრებაში არსებული „ვიკინგის“ ტიპის ცეცხლსასროლი იარაღი. სროლის მანძილზე დანიშნულია ექსპერტიზა, ასევე ექსპერტების მიერ განხორციელდა ნიმუშების აღება. მოწმის სახით გამოიკითხა არაერთი პირი.

საქმეზე ჩატარებული გამოძიებით დგინდება, რომ სროლის განხორციელების მომენტში ს.გ. საცხოვრებელ ბინაში იმყოფებოდა მარტო. მასთან სტუმრად მყოფმა პირებმა ს.გ.-ს ბინა დატოვეს სროლის განხორციელებამდე რამოდენიმე ხნით ადრე, რაც დაადასტურეს მოწმის სახით გამოკითხვისას როგორც თავად აღნიშნულმა სამმა პირმა, ასევე საცხოვრებელი კორპუსის დატოვების ფაქტი ასახულია  კორპუსზე დამონტაჟებული სათვალთვალო კამერით“, – აცხადებენ პროკურატურაში.

პროკურატურა კანონით დადგენილ ვადაში მიმართავს სასამართლოს, ბრალდებულისთვის აღკვეთის ღონისძიების სახით პატიმრობის შეფარდების მოთხოვნის თაობაზე.

პროკურატურის ინფორმაციით, ს.გ.-ს მიმართ წარდგენილი ბრალდება გათვალისწინებულია საქართველოს სსკ-ის 108-ე მუხლით, რაც სასჯელის სახედ და ზომად შვიდიდან თხუთმეტ წლამდე თავისუფლების აღკვეთას ითვალისწინებს.

“ალია” შეგახსენებთ, რომ ჩვენ ექსკლუზიური ინტერვიუ ჩავწერეთ მეზობელთან, რომელიც აცხადებდა, რომ დაინახა რამდენიმე ადამიანი აივანზე, ხოლო რამდენიმე ადამიანი ეზოში, როგორ ეძებდა რაღაცას და სავარაუდოდ ტყვიებს.

რომელ საათზე მოხდა გასროლა და რომელ საათზე წავიდნენ შსს-ს მაღალჩინოსნის მეგობრები – ამაზე პროკურატურა ჯერ არ საუბრობს.

ისევე, როგორ პროკურატურა არ აკეთებს ამ დროისთვის განცხადებას არც იმ ფაქტზე, რომ მეზობლებმა ჯერ კიდევ ერთი წლის წინ განაცხადეს იმის თაობაზე, რომ არ კორპუსიდან, ვიღაც ისვრის.

რამდენად სარწმუნოა ის ფაქტი, რომ მეგობრების წასვლის შემდეგ, პოლიციელმა იარაღიდან სროლით “გართობა” მარტომ გადაწყვიტა – ამაზე ფიქრი მკითხველისთვის მიგვინდია, თუმცა, მას შემდეგ რაც პროკურატურა ზუსტ დროს დაასახელებს, სროლის და სტუმრების წასვლის – უფრო დაწვრილებით იქნება შესაძლებელი იმაზე მსჯელობა – მარტო იყო მართლაც პოლიციელი სროლის მომენტში, თუ არა.