დღეს დილით კიევში ჩავიდა ევროკომისიის პრეზიდენტი ურზულა ფონ დერ ლაიენი. ის ევროპის დღეს უკრაინის დედაქალაქში აღნიშნავს.
ფონ დერ ლაიენმა ტვიტერის ოფიციალურ გვერდზე დაწერა, რომ მოხარულია დაბრუნდეს კიევში, სადაც ყოველდღე იცავენ ევროპელებისთვის ძვირფას ფასეულობებს და კიევი შესაბამისი ადგილია ევროპის დღის აღსანიშნავად.
ევროკომისიის პრეზიდენტი მიესალმა უკრაინის პრეზიდენტ ვოლოდიმირ ზელენსკის გადაწყვეტილებას, რომ 9 მაისი ევროპის დღედ უკრაინაშიც გამოცხადდეს.
2023 წლის 8 მაისს პრეზიდენტმა ზელენსკიმ გამოსცა განკარგულება, რომლის თანახმად, ყოველი წლის 9 მაისს უკრაინა ევროპის დღეს აღნიშნავს.
9 მაისი ევროკავშირის დაბადების დღედ ითვლება. 1950 წლის 9 მაისს საფრანგეთის მაშინდელმა საგარეო საქმეთა მინისტრმა რობერ შუმანმა გამოაცხადა დასავლეთ ევროპის ქვეყნების ნახშირის და ფოლადის მრეწველობის გაერთიანების ინიციატივა, რომელმაც საფუძველი ჩაუყარა ევროკავშირის შექმნას.
კომენტარები