,,კელი დეგნანი რომ ვიცით – კარგია…. მაგრამ, ჭოუ ციენიც რომ დავიმახსოვროთ – არაა პრობლემა“ – დავით ქართველიშვილი

,,ხალხის ძალის” წევრი, დავით ქართველიშვილი:

,,კელი დეგნანი რომ ვიცით – კარგია. მაგრამ, ჭოუ ციენიც რომ დავიმახსოვროთ – არაა პრობლემა. საქართველოში ჩინეთის ელჩს რომ ვუსმენდი, მხოლოდ დადებით, არა ფამილიალურ, მეგობრულ და აჭარულ-ქიზიყურ-კუთხურ კონტექსტში პირზე მეკერა შემოძახილი: “რასსამ ჭოუ!”. ბატონი ელჩი გვესაუბრებოდა საქართველოს გაერთიანების პერსპექტივებზე და ჩინეთის შესაძლო საშუამვლო როლზე ამ პროცესებში. კარგი ურთიერთობები გვაქვსო რუსეთთან, დიდ პატივს გცემთო თქვენ, საქართველოს, და მივესალმებითო თქვენს სამშვიდობო კურსს ქვეყნის გამთლიანების პროცესებში.

დღეს გამიჩნდა სურვილი კიდევ ორი “ახალი” გვარი გაგაცნოთ, რომლებსაც შესაძლოა პირდაპირი კავშირი ჰქონოდა ჩინეთის ელჩის ამ განცხადებასთან. პირველი სახელი და გვარი – გერონტი პატარიძეა. ცხინვალში დრამატული თეატრის ფუძემდებელი და ჩემი უახლოესი მეგობრის და ნათელ/მირონის Paata Pataridze-ს ბაბუა. ბატონ გერონტის კიდევ ჰყავს შვილიშვილები. ერთ-ერთი, “რუსეთ-ჩინეთის ანალიტიკური ცენტრის ხელმძღვანელია”. დედით პატარიძე – სერგო სანაკოევი. საბჭოთა “სამხრეთ ოსეთის” კომპარტიის ყოფილი პირველი პირის, ფელიქს სანაკოევის ვაჟი. იმის მტკიცებას, რომ მთელი ეს ოჯახი საქართველოს დიდ გულშემატკივრებს და პატრიოტებს წარმოადგენენ – მე არ დავიწყებ. სიტყვაზე უნდა მენდოთ.

მოსკოვში სი ძინპინის სამდღიანი ისტორიული ვიზიტის ერთ-ერთი ტექნიკური ორგანიზატორი – სწორედ სერგო სანაკოევი იყო. მან განახორციელა მოსკოვის შუაგულში მაღალი რანგის სტუმრისთვის პატარა ჩინური “ქალაქის” ორგანიზება “ფენ-შუის” წესების ყველა დაცვით. სწორედ მანდ გაატარა სი ძინპინმა თავისი ვიზიტის სამივე დღე და მადლიერების გრძნობა გამოხატა ორგანიზატორების მისამართით, მისთვის ასეთი სიურპრიზის მოწყობის გამო. მე შორს ვარ ჭოუ ციენის განცხადება სერგო სანაკოევის საქმიანობას დავუკავშირო, მაგრამ საქართველოს გულშემატკივართა სახელები და გვარები – უნდა ვიცოდეთ.”