“მაქსიმალურად უნდა შევბოჭოთ ოლიგარქი, კიდევ რამე არ გააფუჭოს” – ვახო სანაია

კანდიდატის სტატუსი უფრო მეტად დაგვაშორებს რუსეთს და დაგვაახლოებს დასავლეთს, რაც ჩვენ მიმართ პარტნიორების მხარდაჭერას მნიშვნელოვნად გააძლიერებს.

თუ ახლა ეს შესაძლებლობა გავუშვით, არავინ იცის, როდის მოგვეცემა კიდევ შანსი.

რუსეთის ამოცანაა, ვერ მივიღოთ სტატუსი.

ივანიშვილი რუსული კანონის მიღებით ანუ პირდაპირ ეროვნული ინტერესების დემონსტრაციული ღალატით ეცადა, კრემლის გეგმა – საბოტაჟი განეხორციელებინა, მაგრამ ხალხმა მარტის დასაწყისში ის რაუნდი მოუგო მოსკოვს.

მიუხედავად იმისა, რომ ,,ქართული ოცნება” 12 პუნქტს არ ასრულებს, ევროკავშირიდან მაინც წამოვიდა სიგნალი – შეიძლება, მოგვცენ სტატუსი დათქმებით. მოგვცენ ჩვენ – ხალხს, მიუხედავად ხელისუფლების საბოტაჟისა. სავარაუდოდ, უკრაინა და მოლდოვა ისევ გაგვისწრებს, რადგან არის ნიშნები, კიევსა და კიშინიოვს მოლაპარაკებები გაუხსნან წევრობაზე. მიუხედავად ჩამორჩენისა, კანდიდატობა, თუნდაც დათქმებით, ქართველი ხალხის დიდი მიღწევა იქნება.

ივანიშვილი გააგრძელებს დიქტატურის ფორმირებას კანდიდატის სტატუსის საკითხის გადაწყვეტამდე და მის შემდეგაც. რთული ამოცანა გვაქვს – დიქტატურასაც უნდა დავუპირისპირდეთ და თან არ მივცეთ საშუალება, სტატუსი ჩაშალოს.

ერთადერთი იმედი სტატუსის გადარჩენის ვართ ჩვენ – ხალხი. მაქსიმალურად უნდა შევბოჭოთ ოლიგარქი, კიდევ რამე არ გააფუჭოს.

თუ ხალხმა ამოცანა შევასრულეთ და ივანიშვილის პირობებში მაინც მოვახერხეთ სტატუსის მოპოვება, დაგვრჩება მეორე ამოცანა – ივანიშვილის შეცვლა მაქსიმუმ 2024 წელს. თუ სტატუსის მიღებიდან 2024 წლის შუალედში მოვახერხეთ, კიდევ უკეთესი. ისე, საუკეთესო ვარიანტი იქნებოდა სტატუსის საკითხის გადაწყვეტამდე მისი ხელისუფლებიდან გაშვება, რადგან ქვეყანას დემოკრატიულ რელსებზე დავაბრუნებდით და სტატუსიც გარანტირებული გვექნებოდა.

ერთი სიტყვით, სტატუსი სასიცოცხლოდ გვჭირდება. ივანიშვილი კი ისედაც ყველა ვარიანტში ჩვენი შესაცვლელია გინდ სტატუსით და გინდ უსტატუსოდ. ამას ჩვენ გარდა ვერავინ გააკეთებს.”