“ცეცხლს ვეთამაშებით, რამოდენიმე ათასი ინფიცირებული გვეყოლება და იქნება დანაკარგებიც”

დაავადებთა კონტროლის ცენტრის დირექტორი, ამირან გამყრელიძე, ფეისბუქლაივის მეშვეობით ჟურნალისტთა კითხვებს პასუხობს:

2 მილიონს მიუახლოვდა ინფიცირებულთა რაოდენობა მსოფლიოში და სამწუხაროდ არის 120 ათასამდე გარდაცვალების შემთხვევა. თებერვალში ვსაუბრობდით რომ სიკვდილიანობა მერყეობდა 1-2 პროცენტს შორის, დღეს კი უკვე 5 პროცენტს მიუახლოვდა და დაავადება უფრო საშიში ხდება სიცოცხლისათვის.

იმ ფონზე, რაც მეზობელ ქვეყნებში ხდება, თითქოს ჩვენ შედარებით მშვიდად გამოვიყურებით. გუშინდელი დღე იყო, როცა ნახტომი დავაფიქსირეთ და გვქონდა 30 ახალი შემთხვევა, რაც საყურადღებოა და საგანგაშო. ერთადერთი იარაღი ვირუსთან ბრძოლის, არის სოციალური დისტანცირება და მისი ინსტრუმენტი – დარჩი სახლში. სანამ ვაქცინა და წამალი შეიქმნება, მანამდე ბრძოლის უკეთესი იარაღი არ არსებობს.

შიდა გავრცელება უკვე სერიოზული გვაქვს, იგივე მედ პერსონალის დაინფიცირება, სასულიერო პირის დაინფიცირება, ეს იმას ნიშნავს რომ ინფექცია ტრიალებს უკვე ქვეყანაში.

ხშირად საუბრობენ იმაზე, რომ მეტია ინფიცირებული 3-ჯერ და ოთხჯერ, არა ბატონებო – შეიძლება იყოს რამდენიმე ათეული ადამიანი, ვისაც სიმპტომი არ გამოუვლინდა, მაგრამ ვერ იქნებდა ასეულობით შემთხვევა, რადგან დროულად გატარდა ქვეყანაში შეზღუდვები, სკოლების და მაღაზიების დაკეტვა, ფრენების შეწყვეტა…

ცეცხლს ვეთამაშებით, ვუყურებ და ბევრი მანქანა დადის ისევ ქუჩაში, 300 ინფიცირებულს რომ გადავცდებით, შესაძლოა უფრო სწრაფად წავიდეს გავრცელება. იცოდეთ, რომ აპრილის ბოლოს და მაისის პირველ კვირებში რამოდენიმე ათასი ინფიცირებული გვეყოლება და იქნება დანაკარგებიც. გთხოვთ, დავიცვათ ყველა წესი. დარჩი სახლში, დაიცავი დისტანცია. არ შევიკრიბოთ სამზე მეტნი.