“გეცნოთ ხომ სიტუაცია?” – დავით ზურაბიშვილი

ანალიტიკოსი, დავით ზურაბიშვილი:

“ლამის ეროვნული მოძრაობიდან მოყოლებული ქართულ პოლიტიკურ ოპოზიციაში დომინირებს, თუ შეიძლება ასე ითქვას, “რაც უარესი მით უკეთესი” ტიპის მიდგომა. ითვლება, რომ ხელისუფლებას რაც მეტ შეცდომას დააშვებინებ, რაც მეტ სისულელეს ათქმევინებ და რაც მეტ ბოროტებას ჩაადენინებ, მით უფრო დაკარგავს ის ხალხის მხარდაჭერას და შესაბამისად გაამრავლებს ოპოზიციის მომხრეებს.

სინამდვილეში კი სულაც არ არის ასე. ხელისუფლების დისკრედიტაცია ავტომატურად არ ზრდის ოპოზიციის ავტორიტეტს, ის მხოლოდ ზრდის განცდას, რომ პოლიტიკა ბინძური და ცუდი საქმეა, ხოლო პოლიტიკოსები ცუდი ტიპები არიან. ამ დროს თუ ოპოზიცია ვერ წარმოაჩენს თავს პოზიტიურ ალტერნატივად, ანუ იმ ძალად, რომელსაც რეალური შანსიც აქვს ხელისუფლებაში მოსვლის და არსებულ პრობლემათა მოგვარებაც უკეთ შეუძლია, ნეგატიური დამოკიდებულება პოლიტიკისა და პოლიტიკოსების მიმართ მათზეც ვრცელდება და საბოლოო ჯამში ამით მოგებული მხოლოდ ხელისუფლება რჩება, რადგან ადმინისტრაციული და ფინანსური რესურსი მას ყოველთვის ოპოზიციაზე მეტი აქვს.

შესაბამისად იქმნება სიტუაცია, როდესაც ხელისუფლება არის არაპოპულარული, მაგრამ მისი დამმარცხებელიც არავინაა.

გეცნოთ ხომ სიტუაცია?”