პროკურატურამ დღეს, 2023 წლის 26 იანვარს, უკანონო მოსმენების საქმეზე ნიკა გვარამია დაზარალებულად ცნო.
ინფორმაციას საქართველოს დემოკრატიული ინიციატივა (GDI) ავრცელებს.
“დაზარალებულად ცნობის შესახებ პროკურატურის გადაწყვეტილებამდე საგამოძიებო ორგანოს ნიკა გვარამიას გამოკითხვის მოთხოვნით 2022 წლის 18 ნოემბერს მივმართეთ. 2023 წლის 10 იანვარს პროკურატურისგან გვარამიასთვის დაზარალებულის სტატუსის მინიჭება მოვითხოვეთ. მას შემდეგ კი, რაც ჩვენს ბოლო მოთხოვნაზე პასუხი კანონით დადგენილ ვადაში არ მივიღეთ, ნიკა გვარამიას დაზარალებულად ცნობის შესახებ საჩივარი საქართველოს გენერალურ პროკურორთან წარვადგინეთ”, – აღნიშნავს GDI.
საქმე ეხება 2021 წლის 13 სექტემბერს მედიაში სუს-ის ე.წ. კრებსების გავრცელებას, რომლის მიხედვითაც, სახელმწიფო უსაფრთხოების სამსახურის მიერ სასულიერო პირების, ჟურნალისტების, ადვოკატების, დიპლომატებისა და სხვა პირების მიმართ უკანონო თვალთვალი, სატელეფონო და პირადი საუბრების უკანონო მიყურადება ხდებოდა.
გავრცელებულ ფაილებში, ნიკა გვარამიას საუბარიც იყო.
კომენტარები