“პრეზიდენტის მხარდასაჭერად მივედი იმ აქციაზე” – გია გაბრიჭიძე

“გუშინ პრეზიდენტის რეზიდენციასთან გამართული აქციის შესახებ არაფერი დავწერე, იმ მიზეზის გამო, რომ საკმაოდ გაოცებული დავრჩი და ასე ვთქვათ ცხელ გულზე რაიმეს თქმა ზედმეტად ჩავთვალე. მოვუსმინე და გადავხედე ბევრ გამოხმაურებას, შეფასებას, გულისტკივილს და გთავაზობთ ჩემეულ შეფასებას, რომელიც გარკვეული პირადი დამოკიდებულებების გამო, საკმაოდ რთული გასაკეთებელი აღმოჩნდა.

ცხადია არ დავიწყებ ვინმესთვის ჭკუის სწავლებას და იმის წერას, რომ „ეს ასე უნდა თქმულიყო“, „ეს ასე უნდა გაკეთებულიყო“, ან „ეს ასე უნდა ყოფილიყო“, რადგანაც ყველამ კარგად იცის თავისი მდგომარეობა, პოზიცია და არსებული სიტუაცია, რამაც უნდა განსაზღვროს შემდგომი განცხადება, თუ ქმედება.

დავიწყებ იმით, რომ პირდაპირ ვიტყვი – საქართველოს პრეზიდენტსა და „ქართულ ოცნებას“ შორის დამოკიდებულება რბილად რომ ვთქვა, არც ისე „თბილია“ და მათი ურთერთობა ხშირად ისეთ კინკლაობას ჰგავს, რაც ნამდვილად არ არის მოსაწონი.

არ ვიცი ქალბატონ სალომეს ვინ მიაწოდა ინფორმაცია გუშინდელი აქციის მიზნის შესახებ, მაგრამ ის დამოკიდებულება რაც მისი მხრიდან გამოჩნდა, მაძლევს საშუალებას ვიფიქრო რომ პრეზიდენტმა ეს მის წინააღმდეგ მიმართულ ქმედებად ჩათვალა, რაც თავშივე არასწორია და გამოიწვია ის რბილად რომ ვთქვა აქციის მონაწილეთა მიმართ არაკორექტული დამოკიდებულება, რაც შემდგომ ბრიფინგზეც დადასტურდა.

– ამ აქციას თან ახლდა სხვადასხვა მესიჯბოქსები, რომლებიც ვრცელდებოდა ამ დღეებში და ეს იყო მიზანმიმართული იმისთვის, რომ მომხდარიყო ზეწოლა პრეზიდენტზე, იმ ადამიანებისგან, იმ პარტიისგან, რომლის მეთაურებიც არსად არ იყვნენ 2007 წელს. 2007 წელს ვამბობ იმიტომ, რომ ეს არის პერიოდი როცა უკვე ყველაფერი მომხდარი იყო და ყველაფერი ნათელი იყო.

დიახ, სწორედ გავრცელებული მესიჯბოქსები იყო ერთ-ერთი მთავარი მიზეზი, რამაც საზოგადოებაში ეჭვები და გაურკვევლობა გააჩინა. გააჩინა ფრაზის „არა და არსდროს“ თქმის და შემდგომ დასავლეთისა და შიდა ოპოზიციის მხრიდან წარმოებული ზეწოლის ფონზე, რასაც ე.წ. კრიტიკული მედია აშკარად სათავისოდ იყენებდა, ხოლო პრეზიდენტის გადაწყვეტილების არასასურველ მოლოდინს კიდევ უფრო ამწვავებდა.

ვატო შაქარიშვილმა ზუსტად განმარტა აქციის მიზანი – დღეს, პრეზიდენტის ადმინისტრაციასთან იდგნენ სააკაშვილის მიერ შვილმოკლული მშობლები, მისგან დაზარალებულები, ადამიანები ვისაც ოჯახი გაუნადგურა, ვისაც თავისუფლება შეუზღუდა, ვისაც ქონება წაართვა, ვისაც ჯანმრთელობა დაუზიანა, ის ადამიანები იდგნენ, ვინც ზურაბიშვილი პრეზიდენტი გახადა უდიდესი თავგანწირული ბრძოლის ხარჯზე! დღესაც, მის გასამაგრებლად და მხარდასაჭერად მივიდნენ, ქვეყნის გარედან მიმდინარე ზეწოლის ფონზე, რომ მას ჰქონდეს საზოგადოების იმედი, არ დაექვემდებაროს ზეწოლას და არ დაუშვას საბედისწერო შეცდომა.

დიახ, სწორედაც ქვეყნის გარედან მიმდინარე ზეწოლის ფონზე პრეზიდენტის გასამაგრებლად, მის მხარდასაჭერად მივიდა ხალხი აქციაზე, მეც სწორედ მაგიტომ ვიყავი და იმასაც ვიტყვი, რომ ბევრმა დამირეკა და მითხრა სურდათ აქციაზე მოსვლა, მაგრამ გარკვეული მიზეზების გამო ვერ ახერხებდნენ.

აქციის ერთ-ერთი გამომწვევი და მთავარი მიზეზი ასევე გახდა პრეზიდენტის მიერ გაკეთებული ორაზროვანი განცხადებები, რომლებმაც გარკვეული ეჭვები გააჩინეს.

გია ვოლსკიმ ამაზე საკმაოდ ლაკონურად და ზუსტად ისაუბრა – დღეს გამოვიდა ის ხალხი, რომელთაც, პრეზიდენტის მიერ გაკეთებული ორაზროვანი განცხადებების გამო, გარკვეული ეჭვები დაებადათ. ამ ეტაპზე სწორედ ამას სჭირდება პასუხი და ვრცელი განმარტება. ამ ადამიანმა ადამიანები აწამა და მმართველობის თუ ადამიანური ურთიერთობების ყველანაირი ნორმა დაარღვია. მის მიერ გაკეთებული განცხადებები გარკვეულ ორაზროვნებას შეიცავს და ამას უკავშირდება მიტინგიც. არ შეიძლება, ყველაფერი დააბრალო რომელიმე პოლიტიკურ პარტიას. ერთადერთი, რაც ზუსტად ვიცით, რომ პოლიტიკური პარტიის მიერ არის ორგანიზებული, ესაა საკმაოდ მძლავრი და კარგად დაგეგმილი შეტევა პრეზიდენტზე, მათ შორისაა მისი ბულინგი.

რაც შეეხება პრეზიდენტის ფრაზას „ეს ადამიანები, რომლებიც დღეს მემუქრებიან სხვადასხვა ფორმით, კარიერით, თუ არ ვიცი რა ფორმით თვლიან, რომ შეიძლება დამემუქრონ, არსად არ იყვნენ მაშინ და ახლა მიკითხავენ მორალს და მასწავლიან, როგორ უნდა ებრძოლო სააკაშვილს, რომელიც დღეს უკვე დაცემულია. მე მაინტერესებს 2007 წლის მერე ეს ადამიანები სად იყვნენ. მე გეტყვით – ერთი იყო მიშას შტაბში და დარჩა დიდხანს, ვიღაცა იყო „ქართუ ბანკში“ კარგად მოკალათებული, ვიღაცა კიდევ სხვა თანამდებობებზე და არ მინდა პერსონალური გავხადო ეს ყველაფერი. არსად არ იყვნენ და რას მიკითხავენ მორალს და რას მასწავლიან მაინტერესებს?! თუნდაც ის ოთხეულები, რომლებიც დარბიან იქით-აქეთ. მე ისიც მინდა ვთქვა, რომ აქ ძალიან ნათელი არის, რომ არის ერთობლივი თამაში რაღაც ძალებს შორის, რომლებიც ვითომ ძალიან დაპირისპირებულები არიან, მაგრამ რეალურად ვინ შეიწყალა მურუსიძე და ჩინჩალაძე? მე? როდის? მე მგონი სწორედ იმ ძალამ, რომელიც დღეს ჭკუას მასწავლის. არათუ შეიწყალეს, არამედ განაწესეს ისეთ ადგილებზე, საიდანაც ვერავინ ვერ მოხსნის მათ და საიდანაც ისინი ძალიან ეფექტურად გვიბლოკავენ ევროპის გზას. ვის აწყობს? რატომ არ კითხულობთ ამას, სანამ ჩემთან მოვარდება აქცია“ იყო აქციის მიზანთან სრულიად შეუსაბამო, შეიძლება ითქვას არაადეკვატური და რამაც არა მხოლოდ აქციის მონაწილეებში საკმაოდ მწვავე რეაქცია გამოიწვია.

ბევრს აღარ ვილაპარაკებ და უბრალოდ ვიტყვი, რომ რეალობისგან ამოვარდნილმა დამოკიდებულებამ გამოიწვია სისხლიანი ოპოზიციის სიხარული და ხატია დეკანოიძის ასეთი განცხადება გამოიწვია – ზურაბიშვილს ოცნების წახალისებული ადამიანების მივარდნისგან დაცვა რომ დასჭირდეს – დავიცავ.”