რა განსაზღვრავს ქართული პირბადის ფასს და როგორ იკერება იგი?

დოლბანდის პირბადე ექიმმაც კი შეიძლება გამოიყენოს, არათუ მოსახლეობამ, – პაატა იმნაძემ ასე უპასუხა ქართული წარმოების პირბადეებთან დაკავშირებით ყველაზე ხშირად დასმულ კითხვას, თუ რა უპირატესობა აქვს დოლბანდის მასალისგან დამზადებულ ერთ-ერთ ყველაზე მოთხოვნად პროდუქტს და რამდენად დაგვიცავს ის გლობალური პანდემიისგან. განმარტებების გასაკეთებლად საზოგადოებას არც ეკონომიკის მინისტრი დაზარდა.

“დოლბანდი იქნა შერჩეული დაავადებათა კონტროლის ცენტრთან ერთად, დაყრდნობით მთელი წლების გამოციდლებაზე და დოლბანდის თვისებებზე, ჩვენ ყველა ოფიციალური დასკვნა ამასთან დაკავშირებით ყოველთვის გვაქვს და დარწმუნებულები ვართ, რომ ერთ-ერთი ყველაზე ეფექტურია ბაზარზე წარმოდგენილ ანალოგებს შორის“.

რა მოცულობის თანხები აქვს გაწერილი მთავრობას პირბადეების სუბსიდირებისთვის, შესაბამისად რა თანხად და რომელი ქვეყნებიდან ყიდულობს ნედლეულს და რა პრინციით შეარჩიეს სამკერვალო საწარმოები. ამ საკითხებზე ღიად ჯერ არავის უსაუბრია.

ეკონომიკის სამინისტროში ამ საკითხებზე სპიკერად სააგენტოს “აწარმოე საქართველოში” დირექტორი მიხეილ ხიდურელი შეარჩიეს. მან პასუხი ვერც სუბსიდიის შესახებ გაგვცა და ვერ ის ქვეყნები დაგვისახელა, საიდანაც დიპლომატების დახმარებით სამედიცნიო დოლბანდს ყიდულობენ, თუმცა, მეტნაკლებად განმარტა, რა პრინციპით შეირჩა ის 9 საწარმო, სადაც პირბადეებს კერავენ:

„ჩვენ არ გვაქვს იმის ფუფუნება, რომ რაიმე სახის პრეფერენცია გავაკეთოთ. ზოგადად ისედაც არასწორია. ჩვენ შევეხმიანეთ მთლიანად დარგს, ყველა სამკერვალო, რომლის მოძიება და მათთან კომუნიკაცია შევძელით. უმეტესმა მათგანმა სურვილი გამოთქვა საწყის ეტაპზე უფასო შეკერვაზეც“. 

რაც შეეხება პირბადეების სუბსიდირებისათვის საჭირო თანხებს, ხიდურელი პასუხობს:

„ჩვენ ფაქტობრივად დამოკიდებული ვართ ზოგადად ვირუსის ხანგრძლივობაზე. ძალიან ძნელი იქნება მოცულობის დასახელება, რა მოცულობის თანხა დაგვჭირდება. იმის მიხედვით, თუ რა მოთხოვნა იქნება ბაზარზე, მუდმივად გავაგრძელებთ გაჯერებას“. 

საწარმოებს ყველა საჭირო ნედლეულს სახელმწიფო აწვდის, რომელსაც მთავრობა დიპლომატიური მისიების დახმარებით ყიდულობს, რადგან ბევრმა ქვეყანამ პროდუქტის სტრატეგიულობიდან გამომდინარე აკრძალა ან შეზღუდა მისი გარეთ გატანა.

„სამკერვალო საწარმოებთან გაფორმებული კონტრაქტების მიხედვით, 1 პირბადის მხოლოდ კერვის ღირებულება 60-დან 70 თეთრამდე ჯდება დღგ-ს ჩათვლით. ერთეული პირბადის დამზადება კი საშუალოდ, 1 ლარი და 8 თეთრი ჯდება“, – აცხადებს ეკონომიკის მინისტრი.

სამედიცინო დოლბანდის ერთ-ერთი იმპორტიორი კომპანიის წარმომადგენელიც გვიდასტურებს, რომ პირბადეების ფასზე გაძვირებული ნედლეულის ფასიც მოქმედებს, რაც ბოლო პერიოდში თითქმის გაორმაგებულია.

„შემიძლია დავადასტურო, რომ დოლბანდზე გაორმაგებულია ფასი მსოფლიო ბაზარზე, რაც დავუშვათ რა ნაშთიც გვქონდა დეკემბრის ბოლოს დაიმპორტებული და ის მარლა, რაც სახელმწიფოს გადავეცით, იმასთან შედარებით შემიძლია დაგიდასტროთ, რომ გაორმაგებულია მარლის ფასი“-აცხადებს შპს სმარტფარმის წარმომადგენელი.

ნედლეულის ღირებულებიდან გამომდინარე, სახელმწიფოს ერთი პირბადის შეძენა 1 ლარზე მეტი უჯდება, თუმცა მთავრობის გადაწყვეტილებით, თითო ადამიანზე პირბადე 50 თეთრად გაიყიდება, დანარჩენ თანხას კი სახელმწიფო დაასუბსიდირებს.

რაც შეეხება, პირბადეების უშუალოდ დამზადებას, აქაც ხარჯთაღრიცხვა მეტნაკლებად ნათელია.

„გამომდინარე იქიდან, რომ საქართველოში არსებული სამკერვალოები ყველა იყო აწყობილი ტანსაცმლის წარმოებაზე, ამაზე გადართვა იყო საკმაოდ რთული. პირბადის წარმოებისთვის არსებობს სპეციალური დანადგარები, რომელსაც საერთოდ არ სჭირდება ადამიანის ჩართულობა, თუმცა, ჩვენ გვიწევს ამით ხელით კერვა, რაც ბევრად ძვირი ჯდება, ვიდრე იმ ჩვეულებრივი დანადგარის შემთხვევაში.

მაგალითისთვის დანადგარი 1 საათში 10 000 ცალ პირბადეს აწარმოებს და ჩვენ 250 კაცით 8 საათის განმავლობაში 25 000 ცალამდე ავდივართ, რაც ხარჯის თვალსაზრისით ბევრად ხარჯიანი და არაეფექტურია.

ეკონომიკის სამინისტრო გვიხდის თვითღირებულებას, რომელიც ჯდება 50 თეთრზე მეტი დღგ-ს გარეშე, მხოლოდ შეკერვის ფასი. ამას ემატება ყველა ის დამატებითი ხარჯი – დოლბანდი, რეზინა და ა.შ. სახელმწიფო ერთ პირბადეზე გვაძლევს 50 თეთრს, რაშიც შედის ჩვენი ხარჯები – 250 თანამშრომლის ხელფასი, საწარმოო ხარჯები – ელექტროენერგია, ტრანსპორტირება და ა.შ.“-აცხადებს ემჯიემ ტექსის ხელმძღვანელი, ელიზბარ ლომინაძე.

ქართული წარმოების პირბადეებთან დაკავშირებით გამოთქმულ კრიტიკას პაატა იმნაძემ საინტერესო პასუხი გასცა.

“მერე შეიძლება დემნა გვასალიამ გამოუშვას ასეთი პირბადე იმიტომ, რომ ეგეთი რაღაცეები მოსწონს ხოლმე. გახსოვთ ალბათ, რა და რა ჰქონდა გამოშვებული. მე ვიზუალსაც ვერაფერს ვუწუნებ“, – პაატა იმნაძე.

bm.ge