“რომელი სტანდარტების მოქმედებდა ტაბულა, როდესაც ელისაშვილისა და ე.წ. „ტროლის“ პირადი მიმოწერა  მთავარ ამბად აქცია?” – იოსელიანი

პირველ რიგში აღვნიშნავ, ფაქტი რომ ალეკომ ვიღაცას აგინა არც ჩემთვის არის მოსაწონი და მისაღები და ალბათ, ჯობდა ალეკოს, ვინმე ობობას შხამიანი პოსტი უკომენტაროდ დაეტოვებინა, თუმცა ამ შემთხვევაში უფრო მნიშვნელოვანი და გასაკვირია გავრცელებული ნიუსის შინაარსი და ფორმა.

ტაბულას ვებგვერდზე არსებული ინფორმაციის თანახმად, მის მიზანს წარმოადგენს კრიტიკული აზროვნების წახალისებითა და ჟურნალისტიკის პროფესიული სტანდარტების დაცვით, ხელი შეუწყოს პროდასავლურ ორიენტაციას, პოლიტიკური პლურალიზმისა და ადამიანის უფლებებისა და კანონის უზენაესობის დაცვას.

საინტერესოა რამდენად თავსებადია ამ მიზნებთან, ალექსანდრე ელისაშვილსა და ტროლს შორის პირადი მიმოწერის მთავარ ამბად ქცევა და ამ ფორმით გამოქვეყნება. გასაკვირია, რატომ არ მიუთითა „უმაღლესი პროფესიული სტანდარტების“ მედია საშუალებამ, ტროლის სახელი და გვარი, რომელიც სავარაუდოდ მისთვის მაშინაც და ახლაც ცნობილი იყო.

ასევე, გაურკვეველია რა ინფორმაციული ღირებულების მატარებელი იყო, „ტროლთან“ პირადი მიმოწერის გამოქვეყნება. ყველა ფაქტი მიუთითებს, რომ არანაირი პროფესიული სტანდარტის დაცვა არ მომხდარა და ამ ინფორმაციის გავრცელების ერთადერთ მიზანს ადამიანის დისკრედიტაცია და მის მიმართ აგრესიის გაღვივება წარმოადგენდა.

ტაბულამ, რომელიც უმაღლეს პროფესიულ სტანდარტსა და ადამიანის უფლებებისა და კანონის უზენაესობის დაცვაზე დებს თავს, უნდა იცოდეს რომ ადამიანის უფლებათა ევროპული სასამართლოს პრეცედენტული გადაწყვეტილების თანახმად (Delfi AS v. Estonia), მედია საშუალებამ არა თუ არ უნდა იმოქმედოს პირის მიმართ აგრესიის გაღვივების მიზნით, არამედ მედია პორტალს ეკისრება ვალდებულება ეფექტური ზომები მიიღოს სიძულვილის ენისა და ძალადობის წამქეზებელი გამონათქვამების შემცველი მოწოდებების გავრცელების შეზღუდვის მიზნით. მედია პორტალი პასუხისმგებელია მისი მომხმარებლების, როგორც იდენტიფიცირებული, ისე არაიდენტიფიცირებულის მიერ, გამოქვეყნებულ კომენტარების შინაარსზე.

ტაბულას მიერ, გამოქვეყნებული ახალი ამბის ქვეშ გაკეთებული კომენტარები კი ცხადყოფს, რომ ტაბულამ არც ეს ვალდებულება შეასრულა, რამდენადაც აღნიშნული ახალი ამბის მიზანს, სწორედ ალეკოს დისკრედიტირება და მისი მიმართ აგრესიის გაღვივება წარმოადგენდა.

დღევანდელ რეალობაში, მაშინ როდესაც სოციალური ქსელი ინფორმაციის მიღების ერთ ერთ ძირითად წყაროდ იქცა, სოციალური ქსელიდან ინფორმაციის აღება პრობლემას არ წარმოადგენს, თუმცა კარგი იქნება თუ საქართველოში მოქმედი მედია საშუალებები მინიმალურ პროფესიულ სტანდარტებს მაინც დაიცავენ, აღნიშნულ სფეროში, ხოლო ჩემთვის როგორც ერთი მოქალაქისთვის გულდასაწყვეტია, რომ ტაბულა, რომელიც საზოგადოებამ კახა ბენდუქიძის ანალიტიკური სტატიებით გაიცნო, ტროლებით ჟონგლიორობამდე მივიდა.”