“დახარეთ იარაღი და დაგველოდეთ” – უკრაინის არმია ბელარუსის არმიას მიმართავს

უკრაინის შეიარაღებული ძალები ბელარუს ხალხს და ბელარუსის არმიას მიმართავს. ვიდეომიმართვაში ნათქვამია:

“საუკუნეების განმავლობაში ჩვენს ხალხებს აერთიანებდა მეგობრობა და მეზობლური ურთიერთობები. ისტორიაში ბევრჯერ მომხდარა, რომ ერთად ვებრძოდით საერთო მტერს, ყოველთვის მხარს ვუჭერდით ერთმანეთს და ვცხოვრობდით მშვიდობით.

დღეს კი თქვენი ხელისუფლება აპირებს შეუერთდეს რუსეთის შეიარაღებულ აგრესიას უკრაინის წინააღმდეგ. აპირებს ჩართოს ბელარუსი ხალხი ამ ბინძურ ომში. შემოწმებების საფარქვეშ დაიწყო ბელარუსის მოქალაქეების ფარული მობილიზაცია, რათა დაკომპლექტდეს რუსეთის ფედერაციასთან ერთობლივი დაჯგუფება უკრაინის საზღვარზე.

უკრაინა არასდროს ემუქრებოდა და არც დღეს ემუქრება ბელარუსს. 24 თებერვლიდან თქვენი სახელმწიფოს ტერიტორია გამოყენება სარაკეტო, საავიაციო და საარტილერიო დარტყმებისთვის უკრაინაზე, სწორედ ბელარუსის ტერიტორიიდან განხორციელდა შეტევა კიევზე. უკრაინას აქამდე არც ერთხელ არ უპასუხია ამ აგრესიულ ქმედებებზე. ჩვენს ხალხებს შორის მეგობრობას ჩვენ ვაფასებთ უფრო მეტად, ვიდრე საშუალებას, რომ ვუპასუხოთ თქვენი ხელისუფლების აგრესიულ ქმედებებს.

თავის განცხადებებში ალექსანდრ ლუკაშენკო საუბრობს არარსებულ სამხედრო საფრთხეებსა და პრევენციული ზომების აუცილებლობაზე. ნათელია, რომ ამით ის ცდილობს გაამართლოს თქვენი ქვეყნის ჩართვა ომში უკრაინის წინააღმდეგ. შეტევის ბრძანებას მიიღებს ერთობლივი დაჯგუფება და იმ შემთხვევაშიც კი, თუ ბელარუსი სამხედროები უარს იტყვიან მოძმე უკრაინელი ხალხის წინააღმდეგ ბრძოლაზე, ამ დაჯგუფების რუსულმა ნაწილმა შეიძლება ისინი მაინც ჩაითრიოს ამ ბრძოლაში. თუ ბელარუსის არმია მხარს დაუჭერს რუსულ აგრესიას, ჩვენ ვუპასუხებთ. ვუპასუხებთ ისევე მძაფრად, როგორც ვპასუხობთ ყველა ოკუპანტს უკრაინის ტერიტორიაზე – შეიარაღების მთელი არსენალის გამოყენებით, თქვენი ქვეყნის ტერიტორიაზე არსებულ სამხედრო ობიექტებზე დარტყმებიც განხორციელებით. ჩვენ არ გვინდა ეს. ჩვენ მოვუწოდებთ ბელარუსის მოქალაქეებს, არ შეასრულონ ხელისუფლების მოთხოვნა და ნუ ჩაერთვებიან ომში უკრაინის წინააღმდეგ. ეს არის დანაშაული ბელარუსის კონსტიტუციისა და საერთაშორისო სამართლის მიხედვით.

მოგიწოდებთ, რომ ნუ გაიზიარებთ იმ სამხედრო დანაშაულებს, რომლებიც უკვე ჩაიდინა რუსულმა ჯარმა უკრაინაში, ჩვენ მოგიწოდებთ, ნუ დაასაფლავებთ თქვენს შვილებს, ქმრებს, მამებს, ძმებს, რომლებიც შეიძლება დაიღუპონ იმის გამო, რომ პუტინსა და ლუკაშენკოს თავიანთი ძალაუფლების დაკარგვის ეშინიათ.

დიქტატორები დავიწყებას მიეცემიან. სამხედრო დამნაშავეები ასე თუ ისე მაინც აღმოჩნდებიან განსასჯელთა სკამზე. კედლები ინგრევა და არც კრემლის კედელია მუდმივი. იმპერიებიც ინგრევა. რჩება ხალხი, რიგითი ადამიანები, რომლებსაც შეუძლიათ, რომ იყვნენ მეგობრები და შეუძლიათ, იყვნენ მტრებიც. როგორ იქნება, ეს დამოკიდებულია არა ლუკაშენკოზე ან პუტინზე, არამედ თითოეულ თქვენგანზე.

თუ თქვენ მაინც გაიძულებენ, რომ გადაკვეთოთ ბელარუს-უკრაინის საზღვარი იარაღით ხელში, ნუ გამოიყენებთ იარაღს, გაჩერდით, დახარეთ იარაღი და დაელოდეთ უკრაინის შეიარაღებული ძალების წარმომადგენლებს. ასეთ შემთხვევაში, თქვენ არავინ გესვრით.

ღმერთი და სიმართლე უკრაინასთანაა და თქვენც სწორი არჩევანი უნდა გააკეთოთ. ჩვენ დარწმუნებული ვართ, რომ ასეც იქნება.

დიდება ბელარუსს. დიდება უკრაინას.”

ვიდეომიმართვის თარგმანს მთავარი არხი აქვეყნებს.