ახალი დეტალები წყალტუბოში მომხდარზე – ქალი სხეულის დამწვრობით გარდაიცვალა, პოლიციაში ძალადობაზე შეტყობინება არ შესულა

ვრცელდება წყალტუბოში მომხდარ ტრაგედიაზე ახალი დეტალები, რომელიც არსებითად ცვლის გავრცელებულ ვერსიას, შინაგან საქმეთა სამინისტროს ინფორმაციით, წყალტუბოში 1988 წელს დაბადებული ქალი სხეულის დამწვრობის გამო გარდაიცვალა.  

დღეს, 7 სექტემბერს მედიამ გაავრცელა ინფორმაცია, რომ ქალი ქმარმა მოკლა – უწყებაში განმარტავენ, რომ ამ დრომდე ოჯახიდან ძალადობასთან დაკავშირებით შეტყობინება არ მიუღიათ. გამოძიება გრძელდება.

“წყალტუბოს მუნიციპალიტეტში 6 სექტემბერს მომხდარ ფაქტთან დაკავშირებით, რა დროსაც ოჯახის ორი წევრი ბენზინის აალების შედეგად დაშავდა, 7 სექტემბერს კი კლინიკაში 1988 წელს დაბადებული დაშავებული ქალი გარდაიცვალა,  გამოძიება სისხლის სამართლის კოდექსის 11 პრიმა 116-ე და 11 პრიმა 188-ე მუხლებით მიმდინარეობს.

ოჯახიდან წარსულში ძალადობასთან დაკავშირებით შეტყობინება პოლიციაში არ შემოსულა.

მომხდართან დაკავშირებით გამოკითხული არიან ფაქტის შემსწრე ოჯახის წევრები, გრძელდება საპროცესო და საგამოძიებო ღონისძიებები, ჩანიშნულია შესაბამისი ექსპერტიზები”. – ვკითხულობთ შსს-ს ოფიციალურ განცხადებაში.

მომხდარზე ახალ დეტალებს მოგვიანებით კვლავ შემოგთავაზებთ.