ანი დვალიშვილი
გახსოვთ, არც თუ დიდი ხნის წინ „ალიაში“ ექსკლუზიურად რომ ვწერდით, შემოდგომისთვის ხელისუფლება სატრანსპორტო ჯარიმებს გაზრდის და ახალსაც დააწესებს, ბიუჯეტი რომ შეავსოსო?! ჰოდა, ისე ყველაფერი კარგი აგიხდეთ, როგორც ეს ახდა – ჯარიმები გაიზარდა და ახალი რეგულაციებიც მალე იქნება. მაგალთად ის, რომ 2023 წლიდან, ძალიან დიდი ალბათობით, კატალიზატორის არმქონე ავტომობილები, ტექ-დათვალიერებას ვერ გაივლიან. ჯერჯერობით, ეს მხოლოდ 2021 წლის შემდეგ შემოყვანილ ავტომობილებზე მოქმედებს, მაგრამ ძველი მანქანებისა და შესაბამისად, გამონაბოლქვის შემცირების მიზნით, „ზემოთ“ ამას უკვე განიხილავენ…
პურის ფქვილზეც უნდა ვთქვათ – ცალკე ამერიკა ეუბნება ხელისუფლებას, 5 მილიონ დოლარს მოგცემ და ხორბალი დათესეო და ცალკე ფერმერები ითხოვენ, უქმად მყოფი მიწები შეღავათიანი იჯარით მოგვეცით, ხორბალი რომ დავთესოთო. ვერ გეტყვით, რატომ არ ფიქრობს სოფლის მეურნეობის სამინისტრო ამ მიმართულებაზე, მაგრამ ფაქტია, ისინი მეფუტკრეობის და კენკროვანი კულტურების გაშენებას უფრო მეტ ყურადღებას აქცევენ. მეფუტკრეობა კი ძალიან დიდი პრობლემაა – საქართველოს რეგიონებში საკანალიზაციო სისტემის არარსებობის გამო, ჩვენმა თაფლმა ევროკავშირის კი არა, აზიის ქვეყნების ელემენტარული მოთხოვნებიც ვერ დააკმაყოფილა. და ამის მიუხედავად, სოფლის მეურნეობის სამინისტროს ოფიციალურ გვერდზე დღესაც წერია, რომ თუ ვინმეს ფუტკრის მოშენების სურვილი აქვს, სახელმწიფო დაეხმარება და 70%-ით დააფინანსებს. ერთადერთ შემთხვევაშია თაფლი ევროპის თუ აზიის ბაზრებისთვის დამაკმაყოფილებელი – ფუტკარი ისეთ ადგილზე უნდა იყოლიოთ, სადაც, 7 კილომეტრის რადიუსში, არ იქნება საკუთარი საპირფარეშო, ჩეჩმა, სადაც ფუტკარს ექნება წვდომა ფეკალურ მასებზე.
ფუტკარი იქეთ იყოს და, საადრეო ყურძენი უკვე შემოვიდა და ბაზარშიც იყიდება. სახელმწიფოს მიერ დაწესებული 90 თეთრის მიუხედავად, 1.20 ლარზე ნაკლებად, საღვინე ყურძენს ვერ იშოვით და ეჭვი გვაქვს, მევენახეები ყველაფერს გააკეთებენ იმისთვის, რომ მოსავალი ქარხნებს კი არ ჩააბარონ, არამედ რეალიზაცია თავად, ბაზრებში გაუკეთონ, სადამდეც ამას შეძლებენ. ისე, ურიგო არ იქნება, სახელმწიფოს ჰქონდა ადგილი, რომელსაც დაერქმევა სახელმწიფოს მარანი, თავად სახელმწიფო იყიდის ყურძენს, დააყენებს ღვინოს და ამ ღვინოს ოფიციალურ შეხვედრებსა თუ ვიზიტების დროს გამოიყენებს. ამ ნაბიჯით იხეირებს ბიუჯეტი (სახელმწიფო სახსრები აღარ დაიხარჯება უცხოური დელეგაციებისთვის გასამასპინძლებელ ალკოჰოლზე), იხეირებს გლეხი, რომელიც შეეცდება, საუკეთესო ყურძენი ჰქონდეს, რათა სახელმწიფომ სწორედ მისგან იყიდოს და ღვინის რეკლამირება კიდევ ერთხელ მოხდება…
მაშინ, როცა ევროპა რთული ზამთრისთვის, უშუქობისთვის და უგაზობისთვის ემზადება, საქართველოს ტყის მასივის ძალიან დიდი ნაწილი ხანძრებმა შეიწირა. გარდა იმისა,რაც ცეცხლმა შეჭამა, აქტიურად მიდის ტყის იმ ნაწილის გაჩეხვა, რომელიც ერთი შეხედვით მიუვალია. საუბარი სვანეთისა და რაჭს ტყეებზე გვაქვს, საიდანაც ყოველდღიურად ათასობით კუბურუ მეტრი მასალა გადის ერთადერთი მიმართულებით – ირანში. კუბის ფასი ადგილზე 500 დოლარია და იმდენი ოფიციალური თუ არაოფიციალურ მჭრელი გამოჩნდა, მიუვალი ტყეები მალე გახდება ჩვეულებრივი მინდორი და მერე ბოლო ხმაზე ვიძახოთ, ტყე შეუნახე შვილებსაო. „ნამოხვანჰესი“ თურქულ კომპანიას იმიტომ არ ავაშენებინეთ, 49 წლით იღებენ ტყეს და რომ გაჩეხონ, ხმას ვერავინ გასცემსო და ახლა ზუსტად იგივეს ჩვენ ვაკეთებთ. სავარაუდოდ, ქართული ნაჯახი სხვანაირად ჭრის…
შემოდგომის დადგომასთან ერთად, მომენტალურად აიწია ფასებმა სოფლის მეურნეობის პროდუქტებზე და უკვე გვეუბნებიან, რომ მაგალითად ვაშლი, ორმელიც 1.50-ზე იაფი არც ახლა ღირს, შემოდგომის მიწურულს, საუკეთესო შემთხვევაში, 5 ლარი ეღირება. საუბარი აღარ არის სხვა ხილზე, რომელიც სეზონზე უკვე გავყიდეთ მეზობელ სომხეთსა და თურქეთში, ისინი იქ, სამაცივრე მეურნეობებში ალაგია და ზამთარში ათმაგ ფასში დაგვიბრუნდებიან. ზოგადად, ხელისუფლება ყველაფერს აკეთებს ყველა მიმართულებით, რომ ხალხს უფრო მეტი საბაბი მიეცეს, ახლო ნათესავები აგინოს. ამაში ბადალი არ ჰყავთ. თან წელს, გვალვების გამო, ყველაფერი ძვირი იქნება და მათ შორის სიმინდის ფქვილიც, რომელიც ახლა 5 ლარი ღირს და ზამთარში რა ეღირება, ვინ იცის.
ხუმრობა-ხუმრობაში, გაიზარდა ადგილობრივი ყველის ფასი და ნორმალურ ყველს 12-14 ლარად თუ იშოვით, დიდი შეღავათია. აღარაფერს ვამბობთ სულგუნზე, რომლის ფასმა 20 ლარს გადააჭარბა ეს ყველაფერი, როგორც გვარწმუნებენ, სწორედ რომ გვალვის ბრალია – როგორც აღმოსავლეთ, ისე დასავლეთ საქართველოში, ბალახის სერიოზული პრობლემაა და ფასის აწევაც ამან გამოიწვიაო.
სხვათა შორის, კვერცხის მწარმოებელმა რამდენიმე მცირე კომპანიამ მოგვმართა, დიდი კომპანიები გვახრჩობენ, ფასებს ხელოვნურად აგდებენ და გვაკოტრებენო. ამასთან ერთად, თუ გახსოვთ, უკრაინიდან კვერცხის შემოტანა რომ აიკრძალა და ერთ თვეში ადგილობრივი წარმოება 22%-იდან 97%-მდე გაიზარდა, საქმე კვლავ უკან წავიდა. ისევ განახლდა კვერცხის შემოტანა (ამჯერად თურქეთი და ირანი აქტიურობს), ადგილობრივ ბაზარზე კი დიდი კომპანიები პატარებს კლავენ, რადგან თავად ჰქონდეთ სრული მონოპოლია, როგორც შემოტანილ, ისე ადგილზე ნაწარმოებ კვერცხზე და თუ პატარა კომპანიები შემოდგომას ვერ გადაიტანენ და გაკოტრდებიან, ზამთარში კვერცხის ფასი 50 თეთრი ისე გახდება, როგორც დაგიბარებიათ.
სასწავლო წლის დაწყების მოახლოებასთან ერთად, გაძვირდა საკანცელარიო ნივთები, ფეხსაცმელი, ტანსაცმელი და ეს ყველაფერი მძიმე ტვირთად მშობლებს აწვებათ. ყველას სურს, მისი შვილი სკოლაში ახალი სამოსით მივიდეს, მაგრამ ეს თანხა ბევრს უბრალოდ არ აქვს. და კიდევ ერთი, ძალიან მძიმე საკითხი – გასულ კვირას, სოციალური ქსელი გადაჭრელდა აბიტურიენტების მიერ ნაჩვენები შედეგებითა და სხვადასხვა სასწავლებელში მოხვედრით გამოწვეული აღტკინებით. ბევრმა ვიდეოებიც დადო, უფრო ბევრმა – ფოტოები და სასწავლებლის სახელი მიუთითა, თუმცა სახელმწიფოს სრული დაფინანსება ყველამ ვერ მიიღო და სტუდენტების არც თუ მცირე ნაწილი სწავლის ფულს უბრალოდ ვერ გადაიხდის, ამ წელს იმუშავებს, რათა მომდევნო წლის საფასური დააგროვოს და მერე… მერე ან ისევ აკადემიური იქნება, ან მშობლები ნემსის ყუნწში გაძვრებიან და რამეს მოიფიქრებენ. და ასე წრეზე ვივლით, იმ იმედით, რომ რამე ოდესმე გამოსწორდება, რისი არც შანსი და არც პერსპეტქივა არ არსებობს უახლოეს მომავალში.
კომენტარები