საქართველოს საზოგადოებრივ საქმეთა ინსტიტუტის (GIPA) პროფესორი, გიორგი კობერიძე:
“დიმიტრი მედვედევმა სოციალურ ქსელში პოსტი გამოაქვეყნა (შემდგომ წაშალა), რომელშიც ღიად გაცხადებული, დაუფარავი იმპერიული ხედვაა განვითარებული. იგი წერს, რომ როგორც კი კიევისა და მცირე რუსეთის (სამხრეთ უკრაინა) დაკავება მოხდება საბჭოთა კავშირის აღდგენის პროექტი დაიწყება. როდესაც საქართველოს ანექსია რუსეთმა 1801 წელს განახორციელა საქართველო საერთოდ არ არსებობდა და ახლაც რაც დარჩენილია ისიც უნდა შევიდეს რუსეთის შემადგენლობაშიო. მედვედევი აგრძელებს და ამბობს საქართველოს ნაცვლად იყო პატარა მიწები, რომლებიც ცალცალკე გუბერნიებად აღმოჩნდნენ რუსეთის იმპერიაში და ახლაც ცალკე აფხაზეთი, ცალკე სამხრეთ ოსეთი და ცალკე საქართველო შევლენ რუსეთის ფედერაციაშიო.
მედვედევი უფრო შორს მიდის და წერს – რუსეთი იმ მდგომარეობას და დიდებას დაიბრუნებს, რომელშიც ათასი წლის წი ჰქონდაო.
იგი ყაზახეთსაც ემუქრება და ამბობს, რომ რუსეთი არ აპირებს სლავური მოსახლეობის გენოციდს ყაზახეთში და რომ სტოლიპინის (იმპერიული რუსეთის პრემიერი 1911 წლამდე) პერიოდის ეთნო შემადგენლობა (ანუ რუსიფიკაცია) დაბრუნდებაო.
ესაა გაცხადებული გეგმა და მუქარა საქართველოს სახელმწიფოებრიობისა და თავისუფლების წინააღმდეგ. მეტიც, თუკი ვინმეს ჰგონია, რომ ეს საბჭოთა კავშირის პროექტის დაანონსებაა – ცდება. სინამდვილეში კრემლი მედვედევის ხელით იმპერიულ პროექტს რუსიფიკაციას და სახელმწიფოების რუსეთის შემადგენლობაში ისეთ ათქვეფას გულისხმობს, სადაც ნაციონალური იდენტობა მხოლოდ რუსული იქნება. სწორედ ამიტომ იყო ნახსენები სტოლიპინი, რომელიც რუსიფიკაციის აქტიური მომხრე იყო და სწორედ ამიტომ გაუსვა ხაზი მედვედევმა დაშლილ და დაქუცმაცებულ საქართველოს. ესაა დეკლარირებული აგრესია საქართველოს წინააღმდეგ. ამ დროს თბილისში ვიღაცები სიმხდალეშერეული ტონით კანკალებენ – აბა ომი გინდათო?!
და ბოლოს, არავინ დაივიწყოს ის ფაქტი, რომ კრემლის იმპერიული აზროვნება მეცხრამეტე საუკუნეშია ჩარჩენილი, რაც სიტუაციას კი არ ამსუბუქებს, არამედ ბევრად საშიშს ხდის.
კომენტარები