„ჯერ გაყალბებული არჩევნები „გაუპრავა“ ოპოზიციამ „ოცნებას“, ახლა მზად არიან, ევროკავშირის სტატუსის საბოლოოდ დაკარგვაც „გაუპრავონ“ – გიორგი გუგავა

ლევან ჯავახიშვილი

„ალიას“ ესაუბრება „ლეიბორისტული პარტიის“ გენერალური მდივანი, გიორგი გუგავა:

– ხელისუფლება არ ჩერდება და იმ დაანონსებულ კომისიებს ქმნის, რომლებმაც ვითომ საქართველოსთვის ევროკავშირის სტატუსის მოსაპოვებლად უნდა იმუშაონ, სხვა და სხვა სფეროში რეფორმები გაატარონ. ოპოზიციის ნაწილი მიჰყვება ამ თამაშში „ქართულ ოცნებას“ და აპირებენ ამ კომისიებთან თანამშრომლობას, მათ წევრობას. ჩემი აზრით, საბოლოოდ, „ქართული ოცნება“ ჩაშლის პროცესს, არანაირი რეფორმები არ გატარდება, ევროკანდიდატის სტატუსზე 2023 წელსაც უარს გვეტყვიან და მერე კომისიის წევრებს დააბრალებენ ყველაფერს. ოპოზიციონერები ამ ფანდს ვერ ხვდებიან, თავს ისულელებენ თუ სხვა მიზეზის გამო მიჰყვებიან წინასწარ წაგებულ თამაშში ხელისუფლებას?  

– მიხვედრაც არ უნდა, ლევან. პირდაპირ გვითხრა ევროკომისიამ, რა უნდა გაკეთდეს რომ სტატუსი მივიღოთ, 12 პუნქტად ჩამოგვიყალიბეს ყველაფერი. იქ ერთი პუნქტია სასამართლოს დამოუკიდებლობა, რაც თავისთავად მოსამართლეთა კლანის დაშლას ნიშნავს. ამათ ადგნენ და ამ კლანის ერთ-ერთი ლიდერი, მიხეილ ჩინჩალაძე ისევ სააპელაციო სასამართლოს თავმჯდომარედ დანიშნეს, ეს ჯინაზე გააკეთეს. იქ ერთ-ერთი პუნქტია დეოლიგარქიზაცია და ახლა დგანან და ამტკიცებენ, ივანიშვილი არ არის ოლიგარქიო. ღიად აცხადებენ, რომ არაფრის შეცვლას არ აპირებენ და ეს კომისიებიც ბლეფი იქნება. ოპოზიცია რაც პარლამენტში შევიდა, სახე იცვალეს და ეს შემთხვევით არ ხდება. მათგან გარკვეული ძალები რომ ივანიშვილისგან ფინანსდება, ეს ვიცი და დანარჩენებისა რა მოგახსენოთ, არ ვიცი და ვერც მათი ეს უცნაური საქციელი ამიხსნია. რატომ მიყვებიან ამ, მართლა წინასწარ წაგებულ თამაშში, რატომ იღებენ პასუხისმგებლობას იმაზე, რომ ბოლოს თუ ევროკანდიდატობას არ მოგვცემენ და მათ დააბრალებენ? ან რა კომისიები აუტყდათ, 15 კომიტეტია პარლამენტში, საქმეს იქ არავინ აკეთებს და თუ რაიმეს სასიკეთოს გაკეთება უნდათ, ადგნენ და იმ კომიტეტებში გააკეთონ. ბოლოს მაინც პარლამენტის მისაღებია ის კანონები, რომელთა მეშვეობითაც ის 12 პუნქტი უნდა შესრულდეს. კი, ბოლოს ყველაფერი ისე დასრულდება, როგორც თქვენ თქვით -„ქართული ოცნება“ ჩაშლის ევროკანდიდატის სტატუსის მიღებას და ოპოზიციას დააბრალებს. ჯერ გაყალბებული არჩევნები „გაუპრავა“ ოპოზიციამ „ქართულ ოცნებას“, პარლამენტში რომ შევიდნენ და ახლა მზად არიან, ევროკავშირის სტატუსის საბოლოოდ დაკარგვაც „გაუპრავონ“. არ ვიცი, ეტყობა ვერ ელევიან იმ სავარძლებს, კომფორტს, რაც პარლამენტში აქვთ – მაღალი ხელფასები, პერსონალური მანქანები და მძღოლები, უფასო ვიზიტები უცხოეთში და ა.შ. იმ უბედურებაში, რაც ქვეყანაში ტრიალებს, პარლამენტში შევარდნილი ოპოზიციის წილიც საკმაოდ დიდია და ამ თამაშის დასრულების მერე, კიდევ უფრო გაიზრდება.