„ეს უკვე ზედმეტია, ეს აღარ უნდა ექნათ“ – ვალერი გელბახიანი სოსო გოგაშვილის საქმეზე

ლევან ჯავახიშვილი

„ალიას“ ესაუბრება იურისტი, ვალერი გელბახიანი.

– გრიფით „საიდუმლო„ და „სრულიად საიდუმლო“ მასალები უპოვნეს სოსო გოგაშვილს სახლში, „ფლეშკაზე“ გადაწერილი და პროკურატურაც მიანიშნებს, რომ ეს მასალები სუს-იდან არის გატანილი.

– არ ვიცი, თვითონ ამბობს გავიტანეო და ჩვენ ხომ არ ვიცით, მართლა გაიტანა თუ არა. არც ის ვიცით, ჩხრეკისას ის მასალები ამოიღეს, რომლებზეც ამბობდა, უნდა გავასაჯაროო. თუ გაიტანა, არც ის ვიცით, რა გაიტანა და რა დონის საიდუმლო ინფორმაციებია. ლოგიკურად, საიდუმლო მასალები სახლში არ უნდა შეენახა. პოსტი, რომელიც გოგაშვილს ეკავა, ეს იყო სახელმწიფო უსაფრთხოების ერთ-ერთი უმნიშვნელოვანესი რგოლი. კი, ბატონო, ხელი მოუწვდებოდა თითქმის ნებისმიერი სახის საიდუმლო ინფორმაციაზე. სახლში რა წაიღო და რა არა, ეგ არ ვიცი. იმედია, მალე გაირკვევა. ის ვიცი, რომ აგენტურა ერთია და არის კიდევ სადაზვერვო ინფორმაცია, რომელთა გახმაურებაც ისჯება კანონით. უზარმაზარი ფული იხარჯება ნებისმიერ სახელმწიფოში და მათ შორის საქართველოშიც, ამ ინფორმაციის უსაფრთხოდ შესანახად. ჩვენ პატარა ქვეყანა ვართ, მაგრამ ათამდე სახელმწიფოს ჰყავს სადაზვერვო რეზიდენტურა საქართველოში. ამ ყველაფერს სჭირდება თვალთვალი, გამოვლინება. ეს უზარმაზარ თანხებთან არის დაკავშირებული. ამის გამოტანა და გამომზეურება ნიშნავს, რომ თავზე ჩამოვიმხოთ ყველაფერი. ამიტომ, წინასწარ უნდა სცოდნოდა ყველას, რომ გოგაშვილის საქმეს გრიფი „საიდუმლო“ დაედებოდა და სასამართლოს სხდომებიც დაიხურებოდა. შესაბამისად, გამოძიების პროცესიც დახურული იქნება. გამოძიების მიერ მოპოვებული ყველა მასალა ხელმიუწვდომელი იქნება მედიისთვის, დაინტერესებული პირებისთვის, საზოგადოებისთვის… მხოლოდ ადვოკატს ეცოდინება, მაგრამ ადვოკატს ხელწერილს დააწერინებენ, რომ არ გაახმაუროს მასალები. ასე ხდება ამგვარი საქმეების გამოძიება.

– საკუთარ სახელზე რეგისტრირებული 13 ერთეული ცეცხლსასროლი იარაღი ჰქონდა გოგაშვილს და ჩხრეკისას კიდევ ორი უპოვეს. ეს უკვე მერამდენე ამგვარი შემთხვევაა? ფაქტია, ჩაუდეს ორი იარაღი.

– მერამდენეა, ეს არ ვიცი, მაგრამ ამას ბოლო არც ერთი ხელისუფლების დროს არ მოეღო… ეს უკვე ზედმეტია, ეს აღარ უნდა ექნათ. თუ მეტი არაფერი აქვთ გოგაშვილის ციხეში ჩასასმელად, სასაცილოა, საძინებელში, საწოლის ლეიბის ქვეშიდან იარაღი გამოიღო. კაცს 13 იარაღი ჰქონდა სახლში კანონიერად შენახული და რად უნდოდა უკანონო ავტომატი ან სხვა სახის იარაღი? ეს სისულელეა. დავუშვათ და გოგაშვილს მართლა ჰქონდა არარეგისტრირებული იარაღი და რაღაც უკანონობის ჩადებას აპირებდა. იმათ სახლში არც ერთ ვარიანტში არ შეინახავდა, რადგან უკვე ისეთი ფონი იყო შექმნილი, გოგაშვილი დაკავებას თუ არა, მინიმუმ სახლის ჩხრეკას ელოდებოდა. ვფიქრობ, ეს იარაღები ამოვარდება საქმიდან. იარაღებზე დნმ-ი უნდა ამოვიდეს, ექსპერტიზები უნდა ჩატარდეს. მთლად ეგრე არ არის. საკონსტიტუციო სასამართლოს გადაწყვეტილება არსებობს, ჩხრეკა როგორ ტარდება ასეთ შემთხვევაში და ეს კანონიც დარღვეულია. ეს საქმე „თავს ვერ დაიჭერს“ სასამართლოზე, თუ სხვა მტკიცებულებები არ ექნებათ გოგაშვილის წინააღმდეგ. სამარცხვინოა, ამ ხელისუფლებამაც რომ ვერ მოიშალა ეს მეთოდი. ესენი იმასაც ამბობდნენ, ნარკოტიკის და იარაღის ჩადება და ხალხისთვის სროლა ჩვენი ხელწერა არ არისო და ხალხსაც ესროლეს 2 წლის წინ, 20 ივნისს, ხომ ნახე. იარაღი ბევრს ჩაუდეს და ელისო კილაძის შვილს ჩაუდეს ნარკოტიკი, ხომ დადასტურდა და გამოუშვეს, აღიარეს მისი უდანაშაულობა და ამით ნარკოტიკის ჩადების ფაქტი. ჩადება და სროლა ამ ხელისუფლების ხელწერაა.

– ბევრი ვარაუდობს, რომ საქმე საპროცესო გარიგებით დასრულდება, გოგაშვილს პირობითი სასჯელით გამოუშვებენ და სანაცვლოდ, ის არანაირ ინფორმაციას არ გაასაჯაროებს. თქვენ რა ვერსია გაქვთ?

– გამორიცხული არაფერია, მაგრამ ეს იმდენად ხმაურიანი დაჭერა იყო, არა მგონია საპროცესოთი გამოუშვან. შეეცდებიან, სოსო გოგაშვილი სამაგალითოდ და მაქსიმალურად დასაჯონ.