საქართველოს საზოგადოებრივ საქმეთა ინსტიტუტის (GIPA) პროფესორი, გიორგი კობერიძე:
4 ივლისის შეჯამება უკრაინაში:
– სეპარატისტებსა და რუსებს დაღამების ეშინიათ. უკრაინული არტილერია ღამით ყველა მიმართულებით აქტიურდება. დონეცკის რაიონში, რუსეთის საზღვართან ახლოს, სნიჟნეში კიდევ ერთი, ამჯერად იარაღის, სამხედროთა საკვებისა და საწვავის საწყობები დაიბომბა უკრაინული შორ მანძილზე მსროლელი არტილერიის მიერ. ეს უკვე მეორე შემთხვევაა სნიჟნეზე იერიშის. ჯერ კიდევ ომამდე ერთ-ერთი ყველაზე დიდი საწყობები ჰქონდათ რუსებს მოწყობილი ამ მიდამოებში.
– უკრაინელებმა დაბომბეს დონეცკის სამხედრო საწყობები და რკინიგზა. პრაქტიკულად დღის განმავლობაში საარტილერიო ჭურვები უწყვეტად ეცემოდა სამხედრო და სტრატეგიულ სამიზნეებს ქალაქში.
– ზაპორიჟიას რაიონში რუსულ პოზიციებს უკვე დღის განმავლობაშიც ბომბავს HIMARS. სამიზნეებიდან კვლავ მელიტოპოლის სარკინიგზო კვანძი და აეროპორტია. ამასთან, მიზანშია ამოღებული რუსული არმიის ნებისმიერი შეჯგუფება.
– რუსული სამხედრო ძალები ლისიჩანსკიდან სივერსკის მიმართულებით (აღმოსავლეთით, დონეცკის რაიონში) კოლონებად დაიძრნენ. სავარაუდოა, რომ შემდეგი მნიშვნელოვანი საბრძოლო თეატრი სწორედ ამ მიმართულებაზე იქნება. ამასთან, რუსები შეეცდებიან ბახმუტიც დაიკავონ და გადაჭრან M03 მაგისტრალი (რომელზეც, ბახმუტის ჩრდილოეთ, სლავიანსკი მდებარეობს). ამასთან, როგორც სივერსკი, ისე ბახმუტი სარკინიგზო კვანძებია და მათი აღების შემთხვევაში რუსული სამხედრო ტვირთები რკინიგზის გავლით შეუფერხებლად იმოძრავებენ ბელგოროდიდან მარიუპოლამდე.
რაც ყველაზე შესამჩნევია, რუსები ჩქარობენ დონეცკის რაიონში – სანამ უკრაინელები მძიმე არტილერიას დიდი რაოდენობით მიიღებენ, მანამ უნდათ მნიშვნელოვანი ობიექტების დაკავება.
– რუსები მოძრაობას აკეთებენ სლავიანსკის თავზე, იზიუმის სამხრეთით. თუმცა ამ მიმართულებით რუსებს გადაადგილების არეალი შეზღუდული აქვთ. გარემო ტყიანი და ჭაობიანია (სარწყავი წყალსაცავები და მდინარეებია) და საგზაო მაგისტრალის მიღმა სხვა მიმართულებით გაჭრა შეზღუდულია. მაგისტრალის მონაკვეთი კი უკრაინელებს კარგად აქვთ დაჭერილი.
– გაურკვეველია რა ხდება ხერსონში. Economist-მა დაწერა, რომ უკრაინული ნაწილები უკვე ჩერნობაევკასთან არიან და სნაიპერული კონტროლის ქვეშ ჰყავთ სამიზნეები. მოგვიანებით უკრაინელებმა აღნიშნეს, რომ მსგავსი განცხადებები არ უნდა გაკეთებულიყო და არასწორია Economist-ის მხრიდან მსგავს თემაზე საუბარი, რადგან განსხვავებულ მოლოდინებს ქმნის. როგორც ჩანს ხერსონის ირგვლივ უკრაინელები ბევრად უფრო შეფარულად და ფრთხილად მოქმედებენ, ვიდრე სხვა მიმართულებით.
კომენტარები