“მთავარი არხის” გენერალურ დირექტორს, პატიმრობაში მყოფ ნიკა გვარამიას შვილმა, გიკო მაისურაძემ დაბადების დღე პირდაპირ ეთერში ემოციური სიტყვებით მიულოცა.
“ნიკა, პირველ რიგში მინდა გითხრა, რომ ძალიან მენატრები.
უფრო მეტად მიყვარხარ და ძალიან მინდა ამ დღეს შენ გვერდით ვიდგე, მაგრამ, სამწუხაროდ, დღევანდელი გარემოებები გვიშლის ხელს ერთმანეთი პირისპირ ვნახოთ.
ძალიან მწყდება გული, მაგრამ მე ვიცი, რომ შენ ძალიან მაგრად ხარ, ძალიან პოზიტიურად.
მინდა მოგილოცო 46-ე დაბადების დღე და შეგახსენო, რომ შენ ჩემთვის განსაკუთრებულად მნიშვნელოვანი ადამიანი ხარ, რაც არ უნდა შორს ვიყოთ ერთმანეთისგან მე სულ შენ გვერდით ვიქნები.
მინდა გისურვო, გენახოს სრულიად თავისუფალი საქართველო. მე ვხვდები, რას ნიშნავს შენთვის შენი ქვეყნის მომავალი, მე მინახავს შენი ყოველდღიური თავდადებული შრომა შენი ქვეყნის უკეთესი მომავლისკენ და მინდა გითხრა, რომ მე შენით ძალიან, ძალიან ვამაყობ.
ზუსტად ვიცი, რომ შენნაირ მიზანმიმართულ და პატრიოტ ადამიანს ეს შეფერხება არაფერს არ დააკლებს.
რაც არ უნდა მოხდეს შენ ხარ თავისუფალი ქართველი და უძლიერესი ლიდერი.
მე დარწმუნებული ვარ, რომ მალე ყველა ვიზეიმებთ შენთვის უსაყვარლესი ქვეყნის წინსვლას და თავისუფლებას.
ჩემი აზრით, ეს შენთვის ყველაზე მაგარი საჩუქარი იქნება ყველანაირი საჩუქრიდან რაც არსებობს.
დარწმუნებული ვარ, რომ ერთმანეთს ძალიან მალე შევხვდებით და ვიცინებთ.
ვიცი, რომ დაგვიბრუნდები უფრო ძლიერი, უფრო მიზანმიმართული და რაც მთავარია დასვენებული.
მიყვარხარ უზომოდ და შენით ძალიან, ძალიან ვამაყობ,” – აღნიშნა გიკო გვარამიამ.
კომენტარები