„ბიძინა ივანიშვილის ბილბორდებით გახდა სალომე ზურაბიშვილი პრეზიდენტი“ – ირაკლი კობახიძე

ჩვენ გვაქვს საპარლამენტო რესპუბლიკა, პრეზიდენტს სიტყვით რაღაცების გაფუჭება შეუძლია ამ სისტემაში, მაგრამ ბევრს ვერაფერს გააფუჭებს. ამიტომ შეუძლია დარჩეს მის „მესიჯბოქსში,“ რომელიც პირდაპირ ემთხვევა „ნაცმოძრაობის“ „მესიჯბოქსს“, – ამის შესახებ „ქართული ოცნების“ თავმჯდომარემ, ირაკლი კობახიძემ „პალიტრანიუსის“ გადაცემა „360 გრადუსში“ განაცხადა:

„სალომე ზურაბიშვილმა გააკეთა თავისი არჩევანი. ის გამოდის მუდმივად დაუსაბუთებელი ბრალდებებით მმართველი გუნდის მიმართ და ახლა გამოაცხადა, რომ ყველა კანონს დაადებს ვეტოს. ჩვენ გვქონდა არაერთი შეხვედრა მთელი ამ დროის განმავლობაში, მაგრამ მას უჭირს რაღაცების დაჯერება ხოლმე, თუნდაც მარტივი ჭეშმარიტების. ჩვენ მას ვაწვდიდით ბევრად მეტ ინფორმაციას, ვიდრე ზოგჯერ საკუთარ გუნდის წევრებისთვის გაგვეზიარებინა, მაგრამ არ იჯერებდა და ეს მისი პრობლემაა. ეს არდაჯერება მას ხელს უშლიდა რაღაცების გაანალიზებაში.

გვახსოვს, ბიძინა ივანიშვილის ბილბორდებით გახდა ბოლოს პრეზიდენტი სალომე ზურაბიშვილი. მეც ვიყავი [ამ ბილბორდებზე] და გუნდის სხვა ლიდერებიც.

ხანდახან ისეთი რაღაცების სჯერა, რომ ეჭვი მეპარება ხოლმე, მას ამის ნამდვილად სჯერა თუ უნდა დაიჯეროს, მაგრამ ამას არ აქვს არსებითი მნიშვნელობა. ჩვენ გვაქვს საპარლამენტო რესპუბლიკა, პრეზიდენტს სიტყვით რაღაცების გაფუჭება შეუძლია ამ სისტემაში, მაგრამ ბევრს ვერაფერს გააფუჭებს. ამიტომ შეუძლია დარჩეს მის „მესიჯბოქსში,“ რომელიც პირდაპირ ემთხვევა „ნაცმოძრაობის“ „მესიჯბოქსს“, თუმცა, საუბარი იმაზე, რომ „ნაცმოძრაობის“ გავლების ქვეშ არის, ეს უბრალოდ ღიმილის მომგვრელია, ამის რესურსი საერთოდ არ აქვს „ნაცმოძრაობას,“ მაგრამ ფაქტია, მათ აქვთ ერთი და იგივე „მესიჯბოქსი“.