“პრემიერ-მინისტრი კი გვყავს, მაგრამ პრემიერ-მინისტრის პრემიერ-მინისტრი კიდევ სადღაც გვყავს“ – ელისაშვილი

პარტია „მოქალაქეების“ ლიდერი, ოპოზიციონერი დეპუტატი ალეკო ელისაშვილი პარლამენტის პლენარულ სხდომაზე :

„ქვეყანა არ უნდა იმართებოდეს გაუკუღმართებულად როგორც ახლა იმართება, პრემიერ-მინისტრი კი გვყავს, მაგრამ პრემიერ-მინისტრის პრემიერ-მინისტრი კიდევ სადღაც გვყავს“.

ამასთან, ელისაშვილის განცხადებით, ოპოზიციის ამოცანა უნდა გახდეს ის, რომ „ქართული ოცნება“ აიძულოს ევროკომისიის ყველა პუნქტი შეასრულოს.

„მეც აღტაცებით და მადლობით დავიწყებ, იმიტომ რომ ბევრ მიტინგზე და აქციაზე ვყოფილვარ, მაგრამ ასეთი სულისკვეთება, ასეთი ცოდნა და გასიგრძეგანება იმის თუ რატომ იდგა თითოეული ქართველი იქ, იშვიათად მინახავს.

ყველამ იცოდა და ყველა ითხოვდა, რომ საქართველო აღარ იყოს სიბნელის ნაწილი, აღარ იყოს რუსეთის ნაწილი არასოდეს და აღარ იყოს რუსეთის უკანა ეზო, როგორც თვითონ გვეძახიან, არამედ იყოს არა მხოლოდ გეოგრაფიულად, არამედ პოლიტიკურადაც ევროპის ნაწილი. ასრულდეს ჩვენი წინაპრების ნატვრა და ვიყოთ ცივილიზებული სამყაროს ნაწილი.

ზოგი ამბობს რატომ ამბობთ ევროპაში დაბრუნებას, როდის ვიყავით მისი ნაწილიო და როდესაც ჩვენ უარი ვთქვით მაზდიანობაზე, რასაც გვაძალებდნენ მე-4 საუკუნეში და ქრისტიანობა სახელმწიფო რელიგიად მივიღეთ, ერთ-ერთი პირველი სახელმწიფო ვიყავით მსოფლიოში, აი მაშინ გავაკეთეთ დიდი ევროპული არჩევანი.

მას შემდეგ არც ქრისტიანობისთვის გვიღალატია და არასოდეს შეგვიწყვეტია სწრაფვა, რომ ვყოფილიყავით ცივილიზაციის ნაწილი. დღეს ევროკავშირი არის ყველაზე ცივილიზებული სახელმწიფოების ერთობა კაცობრიობის ისტორიაში და ბუნებრივია, რომ სწორედ იქით ვისწრაფვით.

არ ვიცი ბაკურიანში ან ტაგანროკში რა შეთქმულება მოეწყო, მაგრამ ვგრძნობდი, რომ ქართველ ხალხს ერთი არჩევანი აქვს და ეს ევროპაა. იქ დავინახე საჯარო მოხელეები, „ქართული ოცნების“ მხარდამჭერები და კიდევ უფრო გამამხნევა ამ ყველაფერმა. ესე იგი სწორად გვაქვს ყველაფერი გააზრებული.

ერთი ხელის გაწვდენაღა დაგვრჩა, რომ ჩვენი წინაპრების ნაოცნებარი დაგვრჩა, ორი ნაბიჯი დაგვრჩა და ერთი სულ აგერ არის მომწიფებული. ვფიქრობ, ყველამ კარგად უნდა გააცნობიეროს, პირველ რიგში „ქართულმა ოცნებამ“ და ოპოზიციამ, რომ ის 12 პუნქტი არის ჩვენი ისტორიული ამოცანა, ჩვენი ისტორიული დავალება.

მესმის ძალიან ეხამუშება „ქართულ ოცნებას“ ამის მოსმენა, მაგრამ დეოლოგარქიზაცია არის აუცილებელი. ქვეყანა არ უნდა იმართებოდეს გაუკუღმართებულად როგორც ახლა იმართება, პრემიერ-მინისტრი კი გვყავს, მაგრამ პრემიერ-მინისტრის პრემიერ-მინისტრი კიდევ სადღაც გვყავს, თან რომ არ ჩანს ისე.

სახელმწიფო ინსტიტუტები უნდა მართავდეს ამ ქვეყანას და არა ვიღაცა კაცი, ერთი კაცის სურვილზე არ უნდა იყოს აწყობილი მთელი ქვეყანა. ეს არის კეთილგანწყობილი რჩევა და არა თითის დაქნევა ევროპისგან. ამიტომ ახლა გვაქვს ამოცანა, ოპოზიციასაც, ახლა ღობე-ყორეს კი არ უნდა მოვედოთ, ძალიან კონკრეტული რაღაცების შესრულება მოვთხოვოთ „ქართულ ოცნებას“. ისე ნუ გავაკეთებთ რომ ჩვენი ქვეყნის ისტორიის წინაშე შევრცხვეთ. ოპოზიციის ამოცანაა ვაიძულოთ „ქართული ოცნება“, რომ ყველა პუნქტი შეასრულოს“, – აცხადებს ალეკო ელისაშვილი.