ლევან ჯავახიშვილი
„ალიას“ ესაუბრება პოლიტიკური მოძრაობა „ტრიბუნას“ დამფუძნებელი, დავით ჭიჭინაძე.
– 20 ივნისს კონტრ-აქციის ჩატარება რამდენად გონივრულია? თან, ეს კონტრ-აქცია მას შემდეგ დააანონსა „ანტ-ინფოს“ და „კონსერვატიული მოძრობის“ ხელმძღვანელმა, კოკა მორგოშიამ, როდესაც წინა დღეს, ირაკლი ღარიბაშვილმა განუცხადა 20 ივნისის აქციის ორგანიზატორებს, თუ ძალადობა და უკანონო ქმედებები იქნება, ყველა კანონიერ უფლებას გამოვიყენებთ მის აღსაკვეთადო, ერთგგვარად დაიმუქრა. ასევე, ხელისუფლების მხარდამჭერები აცხადებენ, რომ 20 ივნისს ოპოზიცია ხელისუფლების გადატრიალება-დამხობას აპირებს.
– თუ გადატრიალება-გადმოტრიალებზეა ლაპარაკი, მით უმეტეს, კონტრაქცია არ უნდა დანიშნო. აქციები და კონტ-აქციები 90-იანი წლების დასაწყისში იყო და ამან კარგი არაფერი მოუტანა ქვეყანას, ხალხი დააპირისპირა ერთმანეთთან. მერე, არ დაგავიწყდეთ ხელისუფლების ზოგიერთი მხარდამჭერის განცხადება, სამოქალაქო ომით რომ იმუქრებიან და ხელისუფლებამ ამაზე რეაგირება უნდა მოახდინოს. თუ სერიოზული დაპირისპირება მოხდა ამ ორი აქციის მონაწილეთა შორის, ეს ქვეყანას კარგს არაფერს მოუტანს. ვიღაცას თუ ჰგონია, ამ გადატრიალებებით და გადმოტრიალებებით, სამოქალაქო დაპირისპირებებით რაღაცას მიაღწევენ, ძალიან ცდებიან. გადახედონ საქართველოს უახლეს ისტორიას. ვინც ამგვარ უბედურებებში მონაწილეობდა, ხალხმა და ისტორიამ გარიყა და სათანადო ადგილი მიუჩინა. ძალადობრივი ქმედებები ხალხში გაღიზიანებას იწვევს და ამას არასდროს ივიწყებს.
– ანუ ეს ხალხის დაპირისპირების პროვოცირებაა?
– რა თქმა უნდა. როგორ შეიძლება კონტრ-აქციები და ამით ხალხის დაპირისპირების პროვოცირება? ჯგუფი ჯგუფზე ჩხუბია თუ რა არის?! ბარემ მოუწოდონ აქციების ორგანიზატორებმა თავიანთ მომხრეებს და ომი გამოუცხადონ ერთმანეთს დაპირისპირებულმა მხარეებმა. მეტს არც არაფერს ნიშნავს ამ კონტრ-აქციების დაანონსება და სამოქალაქო ომის დაპირება. ეს ადამიანები არაადექვატურად აფასებენ ქვეყნისა და საკუთარ მდგომარეობას. მათ რა პასუხისმგებლობა აკისრიათ, ვერ ხვდებიან. ასე არ არის, ადგე და ვიღაცასთან ჯგუფურად საქმე გაარჩიო. ხელისუფლებაში ყოფნა უზარმაზარი პასუხისმგებლობაა და რაც არ უნდა მიუღებელი იყოს ხელისუფლებისთვის ესა თუ ის ლიდერი, მისთვის მიუღებელი, მაგრამ კონსტიტუციური ქმედებები, ამის გამო, სისხლის დაღვრა არ შეიძლება. ამას არ გაპატიებს ხალხი და ისტორია.
-თქვენ რომელ აქციაზე აპირებთ წასვლას, 16 თუ 20 ივნისის?
– მე წავალ იმ აქციაზე, რომელზეც მართლა იქნება ისეთი მოთხოვნები, რომლებიც ჩვენ ერს გამარჯვებაში გამოადგება. სიმართლე გითხრათ, ამ აქციების შეჯიბრებებში მონაწილეობის მიღებას ნამდვილად არ ვაპირებ. შეიძლება გარედან ვუყურო ამ აქციებს, მაგრამ თუ ხელისუფლება ძალადობას დაიწყებს აქციის მონაწილებზე, მივალ და იმ ხალხს დავეხმარები თავის დაცვაში. თუ კონსტიტუციის ფარგლებში ჩატარდება ყველაფერი და ხელისუფლება, მისი მხარდამჭერები არ იძლადებენ ხალხზე, მაშინ არ წავალ არც ერთ აქციაზე. მე დაველოდებოდი 23-24 ივნისს და ევროკავშირის გადაწყვეტილება როგორიც იქნება, იმის მიხედვით ვიმოქმედებდი.
კომენტარები